港股直擊 | 2019-01-24 10:54

【輪證贏家】需要盾牌嗎？

舊同事Stanley噚日無啦啦WhatsApp嗌飯局，結果連同親愛嘅學弟Kitman加埋坐緊我左邊嘅體育界高手Syvio四條友走咗去Designer同事Ken嘅家姐喺牛下商場裏面嗰間日本嘢度「飯聚」，食完返屋企之後，我就開始覺得個喉嚨有啲乾乾同痕痕地，拿拿聲今日帶住個口罩同啪定龍角散(我聽晚仲約咗人)。

噚日恒指收市都仲爬得到27000點之上，10天線力保不失；今朝見恒指先升67點，開報27075點，依家9點46分做緊27032點，升24點，吽到爆；至於隻恒指Call(11718)同樣都係吽到爆，依家做緊$0.025，比噚日收市低咗一格。

再睇恒指牛熊證街貨圖，熊證似乎有新貨出喎，最貼價嗰兩行已經下移見27100至27199點同埋27200至27299點，雖然呢兩part目前嘅街貨唔多，分別有159張同0張期指，但27300至27399點上到去27500至27599點呢三層，每層都有過千張期指喺度，重貨致極。至於牛證方面，最貼價嘅仍然係26800至26899點，呢度有相當於599張期指，重貨區嚟講呢，就要數落多兩層，即係26600至26699點，呢度有909張期指。

依家9點53分，恒指做緊27003點，跌5點，暫呈高開低收格局。用呢口價度落去街貨圖嘅話，心算都計到如果要現價行去牛或熊證最貼價嗰層嘅門口，其實各爭100點到，你啱呀，根本就夾咗喺中間，本來(11718)好好地朝住近熊證嘅方向，但都被個市夾返喺中間。

噚日喺[下半part]講過，當個市玩到無嘢好玩，升到無力再升嘅時候，又適逢個市場吹緊經濟唔好嘅淡風，咁呢個時候就應該要搵啲無論個經濟有幾差都好，要揸啲「就算經濟冧佢都未冧嘅股份」。

點樣向呢個方向出發搵呢啲股份出嚟？玩得耐股票嘅人隨口嗡都嗡到啲出嚟；諗唔到嘅可以問吓坐你隔離個人，或者睇返噚日[下半part]提出嚟嗰堆「生活之日常」嘅問題，你自自然然就會諗得到。

好啦，開估，基本上穩陣中嘅穩陣嘅代表有：中電(00002)、煤氣(00003)、電能(00006)同埋領展(00823)，你睇呢四隻嘢暫時(10點26分計)為止都仲係逆市升，當中煤氣同領展仲要創上市新高。創新高係有代價嘅，就係好容易會見到高開低收嘅情況，咁啱呢兩隻嘢都係；鏡頭一轉睇隻電能，走勢上佢係最麻麻，不過見日線圖SlowSTC(14,3)兩隻就落到嚴重超賣位，且見DMI嘅ADX喺呢期下行嘅時候佢升喎，即係話呢一轉下行都係有力地跌啦，所以確實係要比多少少時間。

所以若然你想個倉裏面有啲穩陣股做盾牌嘅話，不妨諗諗佢。(講緊嘅係正股，唔係輪，雖則電力係有輪用，但係坊間得三隻且喺輪界嚟講，電能同SPDR金ERF(02840)一樣咁冷)

作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。

電郵：[email protected]；Weibo[下半part]：#Gladyshan#