即巿股評 | 2019-01-14 13:14

【盤房來料】英脫歐協議票決定前魚缸回軟

上星期港股升咗過千點，明日係米字旗國票決脫歐協議大日子，個市偏軟等消息都好正常，不過內地今日公布嘅出口數據大幅低於預期，港股六連升後，今日回吐較為顯著。恒指低開107點，開市後跌幅一度收窄至91點，見過26575點半日高位，其後喺內地公布出口數據後，沽壓增強，跌到一仆一碌，恒指失守100日線(26405點)，半日最多跌471點，見過26195點半日低位。中午恒指報收26299點，跌368點；國指則跌155點，報收10199點。

上星期阿Man都有提過，呢個星期嘅市場焦點由中美貿易談判，轉去聚焦米字旗國脫歐協議票決，尤其係中美談判毫無突破，雙方未有達成任何具體協議，仍要等下一輪更高級別嘅官員談判，雙方都係採取拖字訣，有關貿易戰消息暫時冇得炒作。有關米字旗國脫歐協議，市場普遍相信下議院將否決協議，問題係下一步雙方有乜行動。一旦米字旗國要行無協議脫歐條路，對英鎊滙價及歐洲股市將會帶嚟壓力，其他股市亦有機會出現震盪，港股今日先回吐，可能係震盪前預演。

另一個市場關注嘅，當然係美國息口走勢，雖然聯儲局已開始放鴿，但經濟數據先係聯儲局加息與否嘅依歸，嚟緊將公布12月生產價格指數，一旦數據反映通脹壓力繼續冷卻，加息步伐可望進一步緩和。

不過近日中國公布嘅經濟數據就認真難睇，預期中行降準之後，阿爺將會繼續出招穩住經濟，至於A股有冇得翻生，好視乎今年外資會否加大碼力掃貨。睇番港股呢邊，今日重磅股普遍腳軟，之前彈得較勁嘅醫藥、濠賭股及汽車股，今日回吐壓力亦較大。其實阿Man一直有提住，汽車股反彈唔參與亦無蝕底，面對內地汽車市場持續開放，內地汽車企業無論係土炮抑或合營，將來都唔會有好日子過。

除咗上述幾個板塊回吐壓力較大，今日內銀股亦跌得較為明顯，去年底內地銀行業不良貸款率1.89%，但隨著名義GDP增速回落，預計今年不良貸款生成率跟不良貸款率均會進一步上升，內銀股普遍跌幅超過1%。

油價上周五又顯著回落，唔係阿Man睇死油價升唔起，事實係喺全球經濟開始放緩下，對石油需求有限，亦難刺激油價節節上升，預期油價今年都係有波幅，冇升幅，高追油股免問，反而對油價走勢敏感嘅航空股，逢回吐時更值得留意。

指數方面暫時守咗100日線，表面似乎開始轉弱，尤其上周升市出現咗三個上升裂口，難逃三裂口轉向呢個宿命。不過阿Man傾向上信港股行上落市，呢一轉只要守得住其餘幾條移動平均線，再收復100日線企穩，今個月仍有條件挑戰二萬七大關。

麥狄文

(徐狄怡‧證監會持牌人)