港股直擊 | 2019-01-10 11:30

【輪證贏家】貼價熊證重街貨駐守中

依家10點12分，比平時坐遲一班巴士返公司個原因就係當我平時坐開嗰班巴士埋站時，我先至發現我唔記得帶Hello Kitty包包，呢個包包緊要囉，有八達通、有職員證、有記者證...之後我上樓拎返，本身鎖一次門就搞掂，但我啲「出門障礙症」又番發，最後我來來回回地下同屋企門口三次我先至確定到自己係鎖好門(平時同老爺一齊出門口，係佢鎖門嘅)，雖然係咁，但我上到巴士時仍然覺得好不安，硬係覺得未鎖好。

Anyway，工係要返嘅，我老細錫我但總不會接受我「唔知鎖好度門未」嘅理由而可以比我home office。喺巴士上恒指已經開晒市(U盤時段我咪就係掙扎緊度門閂好未囉)，恒指開市先跌71點，但開市後最低見過26212點，跌250點；不過當我準備落車時(我喺架巴士度掛住「有無鎖門」而無睇到個市架)戰友Jack whatsapp我：「殺26600嘅熊，are you ready？」我就梗係未ready啦，仲喺架巴士上諗緊度門rea咩dy呢！

回一回帶先，噚日揀咗隻恒指牛(60661)出嚟，等到恒指喺下晝1點40分至2點10分，恒指5分鐘圖上SlowSTC(14,3)出現超賣，呢個時候(60661)嘅高低位$0.086/$0.079平均數為$0.825，用呢口價作為買入價，今朝恒指開市下行之後，就算10點零嗰段時間屈返上去，都仲未返到家鄉位。到依家10點40分，剛剛收到由輪商朋友Eva寄過嚟嘅兩盒利是封(多謝！)之後，恒指跌幅又深咗，依家跌171點，做緊26290點。

買輪證之後坐艇唔緊要，千其就唔好溝，因為輪證唔同正股，背條條款複雜又涉及槓桿，分分鐘愈溝愈禍；呢個時候最緊要冷靜同信任自己所分析出嚟嘅走勢就可以，萬一個市場有異動，亦都要勇敢地斬纜。

開返恒指牛熊證街貨圖，怪不得戰友Jack whatsapp得我咁「膠興」(國語廣東話拼音，自己拼吓)啦，原來26600至26699點呢度有成1655張期指坐鎮，再對上一層，即26700至26799點呢度就有成1011張期指喺度，咁吸睛嘅街貨係人見到都心動啦。望埋日線圖，有少少美中不足嘅係恒指現水平仍受制於100天線(26417點)，換保歷加通道睇就梗係無乜問題啦，但同時要留意返下方技術指標SlowSTC(14,3)雖然未上到嚴重超買，但%K線有打橫行跡象，若然%K橫行嘅目的只為等%D線上多少少然後一齊落嘅話，咁就唯有大膽假設個市唔知受邊個刺激，穿一穿條100天線，食咗上方兩part過千張重街貨先，跟住佢再回定繼上就係後話，情況就好似12月3日同4日一樣，點都穿一穿條100天線先再算。

作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。

電郵：[email protected]；Weibo[下半part]：#Gladyshan#