即巿股評 | 2018-10-24 13:10

【盤房來料】港股結算前又係唔生唔死

港股經過噚日急跌後，隔晩喺夜期一度再考驗二萬五大關，皆因早段美股幾乎仆直，三大指數亦齊齊失守250日線，夜期亦被拖累插水，盤中曾低見25050點。其後隨美股跌幅收窄，夜期終於上番25200水平之上，再加上美股喺散場前收復大部份失地，只有標普仍未收復250日線，港股ADR更倒升重上25400水平。

今日港股走勢亦甚為反覆，早段恒指略為高開54點，報25401點，但早段A股仍偏軟，恒指曾跌152點，見25194點半日低位。其後A股回升，上證回勇接近收復2638熔斷底部，港股亦守住25200點水平後反彈，最多升306點，見25653點，但未能企穩10日線(25624點)之上，升勢回順。恒指中午報收25565點，升219點；國指報收10346點，升111點。恒指今日上下波幅逾400點，唔少缸邊友都覺得chok到嘔白泡，但相比起周一同周二嘅單日波幅，今日相對已收歛。阿Man要提醒大家，下周二又係期指結算日，喺結算前兩三個交易日，例牌係唔上唔落玩轉倉，唔綁定條安全帶都咪入場。

成份股接近全面回升，只有舜宇(02018)表現特別差，半日逆市跌5.7%，眾多藍籌之中跑第尾。騰訊(00700)周一強勢反彈至290元水平之上，但噚日一失守292元又再倒水，噚日嘔凸周一跌幅後，今日反彈番1.2%，半日報收281.2元，又再上番條10日線附近。不過騰訊話好有力又唔多似，目前只係淪為大戶將指數舞上舞落嘅工具，喺政策打壓之下，唔覺得騰訊會有乜嘢好下場。

至於港交所(00388)就更加離奇，上周五已失驚無神狂升快過大爬番上去，但以其現價PE仍有35倍計算，真心唔覺得係抵買。不過實在太多散仔睇死港交所，牛熊證街貨幾乎一面倒，再加上港交所貨源一向較騰訊集中，大戶要挾爆港交所淡倉易過借火。平保(02318)亦屬於另一隻強勢重磅股，大市插水時跌得少過人，反彈力度又強過人，睇住75元呢個位，仲企定定呢個位之上，做淡似乎無乜着數。

阿爺救市出招，短期受惠當然係中資金融股，不過早兩日大部份股份急升後，已升至反彈阻力，噚日回調後今日又想再挑戰向上，好似建行(00939)跟工行(01398)半日升逾2%，又係睇番住條20日線，無貨喺手寧願等真突破企穩再作打算。中資金融股有景，但國際金融股就無乜運行，大笨象(00005)又破底，創22個月新低，半日跌幅收窄至0.1%，暫時守住62元。大笨象下星期派第三季度業績，已經有大行講緊第三季撥備大增，對呢個季度業績無期望。另一重磅金融股友邦(01299)走勢亦係危危乎，估計第三季業績表現難維持之前咁風光，短期都好難扭轉弱勢。

相信經過周一及周二一上一落之後，港股呢幾日可能就喺25000至26000點之內上下游走，一來係大戶開始要期指轉倉，二來美股喺下月中期大選前，似有無形之手護盤，就算有眾多不明朗因素充斥，只要唔再無限放大負面因素，美股頂得住，港股想死亦無咁容易。相反，利好消息欠奉，要上番去二萬六點之上企穩又談何容易，唔生唔死正正係港股目前狀況。

麥狄文

(徐狄怡‧證監會持牌人)