即巿股評 | 2018-09-21 11:04

【輪證贏家】恒指牛收工等過中秋

噚日揀咗兩隻牛證，分別係進取恒指牛(66205)同穩健恒指牛(66126)，按恒指5分鐘圖，噚日下晝1點55分時見到SlowSTC(14,3)超買計，(66205)高低證價($0.052/$0.048)中間數$0.05；(66126)高低證價($0.078/$0.075)中間數$0.0765。但噚日見到個市升完之後又腳仔軟，始終都係驚驚地，喺《下半part》都講咗如果尾市守得返條20天線樓上嘅話，咁技術上都叫做升返上保歷加上升通道，兩隻牛證都仲可以守得下。結果噚日收市報27477點，收高於噚日條20天線(噚日數：27411點)，如是者(66205)同(66126)可以返入牛棚度休息，翌日再戰。

今朝恒指開報27712點，即係話噚日target 27600至27699點嗰過千張期指重貨今日全數死亡，如果今朝早一開市見到恒指裂口飆咁多而走(66205)同(66126)嘅話，睇返當時(9點35分)證價最高位分別係$0.08同$0.106，賺幅分別有60%同38.6%；依家10點8分，兩隻牛證證價回咗少少，各自做緊$0.064同$0.091，咁都有20%同18.9%嘅賺幅，應該都夠買多盒月餅下個星期過中秋啦。

依家10點10分，恒指走勢繼續由高位回落，依家做緊26700點，而今朝開市時其實恒指已經踩入27700至27799點，呢度有746張期指，由呢度開始向上數多三層，即28000至28099點呢度就有1166張期指駐守，可能大家都覺得個市對住28000點呢啲齊頭關口阻力會比較大，所以駐重貨喺度啦。同現價比，如果大市由依家無啦啦向上彈升400點嘅話，就可以殺到入呢層嘅門口，而沿途就打爆晒27700至27799點、27800至27899點，同埋27900至27999點嘅街貨，三層夾埋有2067張期指，威力拍得住粒山竹。

至於下方牛證最貼價嘅係27000至27099點，呢度有相當於692張期指，同現價就差600點，留意返，呢600點嘅差距其實沿途一啲嘢食都無，而牛證重貨就落到去26600至26699點，呢度先有1109張期指駐守。

再睇埋恒指日線圖，噚日都講過條「中期下降通道」已經升穿咗，而下方技術指標仍發出向好訊號，反正(66205)同(66126)都已經落袋，今日又星期五，想追多轉嘅可以再吼牛證/Call輪，想等收工返屋企同屋企人食飯嘅，就疊埋心水上網睇吓有咩月餅買返屋企好過。

作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。

電郵：[email protected]；Weibo：#Gladyshan#