港股直擊 | 2018-07-10 11:11
噚日全日都無做過任何動作,事關有重重謎題尚未解開。今朝早喺巴士度戰友Jack WhatsApp同我講話小米終於都浮咗上水面;到完咗U盤之後,恒指開市報28900點;依家9點57分,恒指繼續上,依家做緊28889點,升200點,勢頭似乎好不錯。
再睇埋下方嘅技術指標,MACD同SlowSTC(14,3)都發出良好訊號,但同時噚日所講嘅20天線跌穿咗條250天線嘅,中短期「死亡交叉」呢?今日呢個交叉唔使計住數,一睇就睇得到;更正嘅係20天線(29297點)亦即係用慣嘅保歷加通道中軸嘛,噚日下晝再睇,就算是升,用20天線/保歷加通道中軸作為第一個check point。假設呢個睇升嘅check point不變,但呢條20天線向下斜,即係話恒指由現價至check point中間呢段距離變得愈嚟愈窄。
BTW,今朝同戰友阿Jack WhatsApp時,開恒指走勢圖,見到由上周五(7月6日)到今日以三粒陽燭砌成嘅「上升通道」,再換上條DMI出嚟,一見到條ADX我就同返阿Jack講叫佢都開嚟睇。還記得上周三(4日)嘅〈【輪證贏家】隻Put輪揸住先啦〉嗎?咁就梗係唔記得啦,問你噚晚食乜都要諗一陣先啦,喺嗰篇文度(自己search啦)有一個表係紀錄由6月15日至上周二(3日)恒指同DMI嘅ADX關係,當時指數跌、ADX升,咁即係代表個市係有力向下;再用同一個方法去度量今次恒指升市,即由上周五開始至今比較恒指同DMI嘅ADX關係(見下表),相信大家都大概估到恒指今次反彈力度會係點啦!(唔明買本《鐘擺戰策贏港股》,書展有售!哈哈!)
如果依家買Call/牛證博繼續上,最多食多400點上到20天線就好收手;若然淡友開Put/熊證誓言要鋤返個市落去嘅話,又未係時候呀,事關肥牛未夠多;見呢三日嘅高低位由629點落到依家暫時見148點,就知輪證暫時未有運行住啦。
題外話,早兩日喺FB見到老友阿Milk話佢老頭子(即係佢老爸)整親入咗醫院骨科,噚晚同佢whatsapp,佢話醫生講老頭子受傷嘅部分因為發炎,依家要等消炎之後先至可以做手術,我同阿Milk講要照顧好老頭子;老頭子,你都要戒口呀!唔好食雪糕同飲可樂住啦!
作者阿珊,從事財經及投資版報道超過10年,由平面媒體走到網絡世界,《鐘擺戰策贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected];Weibo:#Gladyshan