即巿股評 | 2018-06-24 10:49
黃國英(Alex)噚晚舉行兩年一度嘅投資Talk Show,筆者當然繼續捧場,大家最關心係Alex是否仍看好後市,以及今次「香港隊」名單推介哪11隻港股。不過與其話Alex係大好友,不如話佢樂觀地面對每一日操作更貼切,佢全晚多次強調"There's Always a Bull Market Somewhere",好鄙視成日將「Cash is King」掛在咀邊嘅人。Alex話,有一千幾百萬嘅人,除了股票之外,其他投資工具選擇不多,包括債券、買樓及做生意都不宜,這樣對股市起支持作用。
Alex話每次股市震完之後,都會平靜一段時間,俾肯學習炒股嘅投資者有喘息機會。筆者亦一直也強調心法及方法比純股份推介重要得多。黃國英兩年前嘅Talk Show提出的「FORCE」投資原則,即「專注」(Focus)、「觀察(Observe)、「反省」(Reflect)、「風控」(Control)及「兌現」(Encash),今次再加多一組「FORCE」投資秘訣,就係靈活性(Flexibilty)、樂觀(Optimistic)、責任(Responsibility)、信念(Conviction)和優勢(Edge)。
佢解釋話,有責任,才知道投資目標,不要賭運。靈活應變,増加彈性,以更多的策略應付變化,包括運用衍生工具,才能捕捉投資機會;投資要樂觀,就如貿易戰,其實沒大不了,時勢做英雄,中國經濟會加快轉型,品牌股有運行;通脹上升,有定價權的公司得益,那些「世界級股王,就係世界級毒販!」另外,Alex仲歸納投資四大支柱,就是「眼光」、「耐性」、「膽識」及「紀律」,說易行難,大家不妨領悟一下。
至於今年Alex俾嘅「香港隊」11隻愛股,「守龍門」繼續係領展(00823)、「後防」包括:友邦(01299)、粵海投資(00270)、北京首都機場(00694)、中國燃氣(00384);「中場」有國泰(00293)、中海物業(02669)、碧桂園服務(06098)、銀娛(00027)及微創醫療(00853);「前鋒」繼續只有騰訊(00700)一隻。整隊香港隊只保留上次名單中4隻股份,即領展、首都機場、中海物業及騰訊,未見兩隻科技股舜宇(02382)及瑞聲(02018),多少反映美中貿易戰陰霾下,兩隻股份估值欠吸引。新加入的股份當中,碧桂園服務的加入令物管股佔去兩個席位;選中國燃氣則因為有望成為首隻「染藍」燃氣股。
筆者當然第一時間把Alex這11隻心水股儲存在EJFQ「精明選股」及「我的組合」內,方便不時一併監察走勢(勢頭能量及RA+),以及預測估值資料(FA+)之變動。11股中,7隻出現綠燈的強勢頭,以中國燃氣及中海物業最強勢,正如Alex話「長路未斷,就追到佢斷纜為止!」,無謂估頂,心水清嘅讀者,都知道Alex最鍾意嘅曹Sir金句係「有智慧不如趁勢」。
至於Alex愛股中,暫時勢頭最弱是銀娛,以及近期受民航發展基金返還政策改動拖累的首都機場,大家不妨多加審視,又或者利用精明選股,將港隊名單略作調整,成為自己打後兩年的心水股名單,挑戰黃國英!
羅崇博 (杜比)