即巿股評 | 2018-03-09 11:04
【輪證贏家】好友搶攻上破「三角形」
噚日係恒指日線圖上畫咗個「三角形」出嚟，「三角形」就即係待變咁解啦，而恒指噚日都同條20天線搏鬥咗好耐，升穿過又回返落去；不過下晝再次升穿嗰下力量好多，拆開恒指5分鐘圖你就會見到喺下晝2點50分有支大陽燭出現，及至收市前雖然升幅又收窄返，不過呢一彈足以令到恒指企穩20天線以上收市；同時意味著「三角形」待變就此告終(企穩20天線仲唔係向上？！)。
依家10點6分，恒指做緊30917點，升262點，暫時最高見過30977點，今朝一開市就連條10天線(30743點)都收復埋，開恒指牛熊證街貨圖度一度高先，用暫時嘅高位嚟計嘅話，大市已經將30700至30799點同埋30800至30899點呢兩part熊證全數食晒，呢個早餐夾埋有839張期指；至於30900至30999點嗰226張期指就當然未全數死亡啦，但唔死都無用，如果個市係餘下落嚟嘅時間上返個高位之後再彈多23點嘅話，就30900至30999點就被滅族，變相最貼價嘅熊證就係31000至31099點，呢度有相當於637張期指；而最重貨嘅就係第二貼價區，即31100至31199點，呢度有相當於1027張期指。按呢期恒指失心瘋彈升400、500點屬等閒事嘅話，今日下晝嚟多round都唔奇。
至於下方牛證就比較凋零啲，最貼價嘅30200至30299點先得嗰45張期指；總之最貼價個四個街區，夾埋都無200張期指啦。重貨區就要殺到落去29800至29899點，有1083張期指，但同現價距離太遠啦，走咁遠去食個堆貨，無意思呀。
仲有，下個星期有長和系業績，緊接就平保(02318)同騰訊(00700)，再次托起個市都唔奇呀，只要條10天線唔好甩就得啦。恒指牛(57727)，收回價30288點，同現價有約600點差距，可以等到下半場見恒指5分鐘圖出現超賣時落場；但大前題係要個市守得住條10天線先呀！
作者阿珊，從事財經及投資版報道超過10年，由平面媒體走到網絡世界，《鐘擺戰策贏港股》作者。相信技術分析，由窩輪到牛熊證無一不炒，唔貪心，志在搵餐下午茶。