即巿股評 | 2018-02-20 13:26

【盤房來料】大笨象回購冇驚喜見光……

狗年首個交易日，阿Man先祝各股友缸邊友，狗年大旺，炒乜贏乜，股場如意，得心應手。今日港股走勢又搞到一地眼鏡碎，今勻真係歲歲(碎碎)平安，當全世界諗住港股可以跟番ADR同黑期條數，見番31400水平或以上，偏偏恒指略為高開49點後倒跌，更一度插水近400點，低見30720點，跌至50日線(30735點)水平見支持，拗腰倒升超過200點，曾高見31340點半日高位，但中午散場前升幅收窄至僅剩36點，報收31151點；國指倒跌22點，中午報收12512點。

重磅股各自發展，騰訊(00700)重上450元水平，最高見453元，中午報收450.8元，升0.8%或3.8元，表現只算係合格。至於港交所(00388)跟平保(02318)分別跌0.8%及0.7%，前者報收277.6元，後者報收86.2元，半日跑輸大市。其他金融股表現偏軟，大笨象(00005)中午公布業績，稅前盈利增1.41倍，但略遜市場預期，而回購計劃未見具體時間表，予人唔夠實在嘅感覺，加上派成績表前已從低位反彈近一成，唔排除業績後有獲利沽壓。

至於去年純利增長23%嘅恒生(00011)，業績叫好過預期，派息亦算慷慨，但又係業績前偷步落鑊，除非有好息之徒搶息，否則可能又係好消息出貨。其他金融股偏軟，內銀股普遍下跌，北水未回歸，少咗北水掃貨，金融股暫時跑輸。

汽車股今日見資金追捧，龍頭吉利(00175)連升五日，半日升3.7%，之前低位有撈貨，短炒有糊食一食亦無壞，其他汽車股普遍向上，只有被大行報級調低投資評級嘅北京汽車(01958)斯人獨憔悴，半日跌3.7%。

雖然新年流流無人想食藥，但醫藥股呢個板塊做好，阿Man月初已表示，醫藥股喺今年可持續跑贏大市，單係之前大市插水之際，醫藥股仍能置身事外，又或者一插即彈，可見呢個板塊有幾咁強勁。今日唔少醫藥股創新高或升至近日高位，擺到明繼續跑贏大市成條街。

阿Man唔睇好今年內房股表現，即使上月內房股一升再升，阿Man未受誘惑，皆因阿爺講到明調控樓市唔會手軟，內房股去年業績再好，今年已難保持去年咁風光，加上咁多內房股之前齊齊向市場抽水，擺明有備而來，預咗內市難復去年好景，趁有價有市先批股集資，為未來日子先作準備。整個內房股板塊均見下跌，話咗博反彈，內房股要見好即收。

預期大市呢兩日表現仍反覆，尤其初七北水先回歸，睇款呢兩日大市都係50日線附近先打打底，望一望牛熊證街貨，今朝一挾又打咗31100至31300嗰批熊仔，向下望望牛證重貨區喺30300-30500點，咪以為現水平31000好遙遠，插多幾百點又劏牛，預咗結算轉倉大市都係兩頭游，要回補31600-31700點裂口，除非北水回歸大力掃貨，否則大型裂口短期唔係咁易補。

麥狄文
(徐狄怡‧證監會持牌人)