即巿股評 | 2018-01-08 13:01
上周五美股再爆升,三大指數齊齊破頂,港股夜期回升,ADR更逼近31000大關,以為今日港股可以十連升,豈料未如人意,港股高開低走,目前在30800點水平爭持。恒指開市曾升逾百點,見過30929點半日高位,再創逾十年新高,可惜唔少重磅股開始腳軟,拖累恒指早段曾倒跌82點,見30733點半日低位,兼回補開市上升裂口,半日報收30801點,跌13點;國指則跌16點,報收12194點。
話咗港交所(00388)係今年重點推介重磅股,今早港交所破頂,高見259.6元為近兩年半高位,半日升近2%,升勢有餘未盡。至於騰訊(00700)更係差些少,半日高位439.2元,未能突破之前高位439.6元,半日報收437.2元,向上動力減弱。至於大笨象(00005)跟平保(02318),上周大市再創新高之際,呢兩隻重磅股已率先掉頭,平保更已逼近20日線(80.6),留意此關需守,否則死恐怕80元大關不保後,股價要下試77.5元,即50日線尋找支持。
濠賭股大漲小回,阿Man講過只要睇好呢個板塊今年表現,短線波動唔需要太介懷,今日濠賭股回升,閒閒地升幅都超過1%,短線回調果然係上車好機會。至於內需股整固幾日,今日靠穩,個別股份更上升,蒙牛(02319)反彈逾2%,安踏體育(02020)亦見回升。
要數近年令缸邊友跌最多眼鏡嘅板塊,一定係內房股,喺內地未見放軟手腳打擊樓市,預期受政策所限,兼且競爭劇烈嘅內房股一升再升,果然有內地資金撐腰,再加𠹺國別投行加內房股打氣,內房股持續有資金流入,刺激該板塊做子,唔少股份更創新高。
醫藥股之前喪升輪流創新高,今日唔少醫藥股創高後,股價開始回調,未有貨唔急於追貨,有貨嘅朋友最嫩訂番個止賺位,一定回調唔多對路要轉勢,不妨先跳車再作觀察。今日又見資源股中嘅煤炭股落鑊,主要係市場憧憬內地煤炭企業將實行改革。不過好老實阿Man一向唔多buy呢個板塊,炒作短癮兼升勢頭易無影,要高追唔使預我嗰份。
至於另一個被視為升市藍籌籠嘅板塊券商股又蠢蠢欲動,主要係缸邊友見上證指數已重上3400重要關口,中資券商股又見炒作。眼見呢個板塊升,唔係諗緊揀邊隻上車,反而係金晴火眼望住個市,一旦出現回調有冇減磅需要,又或者待回調幅度有番咁上下,吼位買貨比起短炒券股股更划算。
麥狄文
(徐狄怡‧證監會持牌人)