2016-04-13 00:00
視線所及 陳心遙
這兩個星期，大家都記住了前美國總統羅斯福的金句：「我們最需要恐懼的，就是恐懼本身。」
恐懼是有正反作用的。審視一下我們的人生，驅使我們拚命奮鬥的，多少是信念，多少是慾望；但又有多少其實只是因為恐懼呢？
努力溫書，因為怕考試慘敗，前路茫茫；努力搵錢，因為怕年老沒有工作能力， 醫療費用昂貴，需要很多很多錢來續命。
我們知道恐懼存在了，怎樣對付呢？曾經聽過一個故事……
在非洲一片偌大的草原上，烈日當空，水牛各自各散步、覓食。水牛仔仔走到水牛爸爸前面，滿腹疑問的模樣。
水牛仔仔：「爸爸，生活喺呢個地方，最需要害怕乜嘢？」
水牛爸爸：「仔，草原上，我哋只係害怕獅子！」
水牛仔仔：「我聽過獅子呢種猛獸。如果我見到佢，我會掉頭全速逃走！」
水牛爸爸：「千祈唔好，最壞嘅策略就係逃走⋯⋯」
水牛仔仔：「點解呀？佢哋咁恐怖，而且會咬死我喎！」
水牛爸爸微笑一下：「如果你逃走，佢會喺後面不停咁追住你。因為你背住牠，佢最後可以撲埋去你毫無防避嘅背脊嗰度，輕易將你捉住。」
水牛仔仔：「咁應該點做好呀？」
水牛爸爸：「仔，你係一隻水牛，唔係毫無抵抗能力嘅綿羊。如果你見到一隻獅子，你應該喺原位企定定，直視佢，唔可以示弱，如果佢唔走，你要俾佢見到你鋒利嘅牛角，你要用前蹄大力踏地，等佢知，就算捉到你，佢至少都要付出少少代價⋯⋯」
水牛仔仔：「黐線咩，我會驚到震⋯⋯如果佢襲擊我咁點算呀？」
水牛爸爸：「你擰轉後面睇下？」
水牛仔仔回頭一看，草原上，遠遠近近都是同類，這原是數百隻水牛群的聚居範圍，每隻水牛都有鋒利的牛角和強而有力的前蹄。
水牛爸爸：「如果你驚、你退縮，然後慌張咁唔知逃走到邊度，我哋反而拯救唔到你。但係如果你選擇直視恐懼，我哋全部同類就會企晒喺背後，同你一齊面對。」
要對抗恐懼，第一是意志：要示威， 不示弱。這並不是虛張聲勢，不是不自量力，這叫做莊敬自強。南華足球隊如果主場和皇家馬德里對陣，香港的球迷還是會到場搖旗鼓掌，吶喊助威，不會因為強弱懸殊而垂頭喪氣，像辦喪事一樣觀戰的。正所謂輸人不輸陣。
第二就是團結：不是那些披着「團結」的外表，實際叫我們逆來順受的那種「團結」。團結是：再不凝聚就會被逐個擊破全軍覆沒而迫出來的力量。
所以我樂觀地認為，最後我們會變得非常團結的。