累人買貴咗

安邦計劃收購Starwood最後是戲劇性收場，當安邦出到14億美元現金價時，連Starwood高層都話呢個價唔講得笑，要認真對待，突然就殺出據聞是中國保監會叫停。

事件中，安邦應該好唔高興，失去了一個購入優質資產嘅機會（平貴是另一條問題），但點都唔夠Marriott慘，無端端俾安邦抬高了10億美金價錢，買貴咗。Marriott高層強調安邦嘅出價係真嘅，只有提高價錢搶Deal，絕對唔敢提是否被安邦愚弄了。但結果是，安邦累人買貴咗。

中國如廿年前日本

《金融時報》有段內幕分析文章，講解事件來龍去脈。主要是，安邦財力足夠，購買嘅意志極大，志在必得，只係規模太大，大到連保監會都覺得唔妥，要煞停。如果內容屬實，呢件買貨不成嘅案例，有參考價值。

中國向外收購，今年一定係破紀錄。中國目前係20年前日本嘅翻版，只係唔知結果會否同日本一樣。人民幣目前係最強嘅時候，往後有跌冇升，唔會值錢得過而家。預期幣值下跌，一定走出去買海外資產。

安邦唔係第一次買海外資產，未試過被叫停，只有今次，原因係價錢太高，佔總資產比例超過15%。呢條界線安邦冇理由唔知，一定知道14億美金出價係唔會有問題，否則自己都知道係無可能。

安邦唔係上市公司，佢嘅資產有幾多，外人冇底。而家話係收購規模過大，還是有其他原因，冇肯定答案。明顯嘅係，你一次過調近千億人民幣外出購物，就算你係買實淨嘅資產，今天嘅環境都唔容許發生。都係嗰句，全中國都係國家隊，私人企業嘅錢都唔輪到你自把自為。今日國家唔想你亂使錢，你要購物都要等指示。安邦雖然購物不成，但已經響晒朵，全世界都識。我肯定，安邦董事長辦公室，而家門口長期有人等候求見，有筍嘢賣畀佢。