2015-11-25 00:00
方如玉帥 方卓如
區議會選舉之後，賽後分析湧現。講嚟講去，傘兵贏出唔靠把遮，長年地區工作嘅大佬可以輸，空降得把口嘅又唔可以贏；年輕嘅贏得老嘢，有經驗嘅又可以砌低後生仔。最後結論，係冇結論，個個捉住某個現象講一大餐，好似好合理，又唔係放諸各區皆準，講完等於冇講。
區議會每個選區咁細，票王都係得四千幾票，幾十票上落定輸贏，其實只係一條村幾層樓，出咗街食飯唔記得返嚟投票咁簡單，唔一定係有乜嘢驚天動地嘅啟示。俾人鎅票輸咗嗰個，輸唔夠一百票，只要冇投票嗰一半選民，有幾層樓嘅街坊肉緊啲，肯為你走多步，落街投票，咁你就俾人鎅票都贏。
捉心理最緊要
活地亞倫有套戲叫Matchpoint，人生好似打網球「賴」網，個波跌落邊一邊，你係贏定輸，天意。區議會選舉上落咁細，你認真去分析部分屬於天意嘅結果，冇意思。
選區咁細，區入面嘅選民心態，只要部分人改變咗，大局就唔同晒。明顯地選民想有得揀，原來放膽畀選民揀，空降都可以贏地膽。選舉唔一定要諗自己點贏，去諗點令你對手輸，效果一樣。地膽在鏡頭面前出醜太多，選民都頂佢唔順，只要有個正常人畀佢哋選擇，話之你截止前一日先報名，對選民從來都冇貢獻，唔怕你精、唔怕你呆，至怕你唔來俾佢投票，一於投畀你，踢走地膽。我一向都講，而家環境係認真便輸了，投票係選民情緒投射嘅方法，唔係搵個人嚟做嘢咁純品。
既然係選民情緒投射，你就要捉到選民嘅情緒係乜。區議會範圍咁細，每個區嘅情緒都唔同，點會有辦法分析到一個概括嘅結論？不過，最明顯嘅大勢係，選民已經唔care候選人本身係乜嘢料子，有冇從政經驗，話之你從政廿年，定係報名前一日臨時決定。這個人本身唔重要，吻合情緒狀況先最緊要。搞選舉，你要化身心理學家、社會學家，從社會嘅氣氛環境，推斷到選民嘅心理狀態，調整選舉策略。
當然，正如Matchpoint套戲一樣，個波跌左跌右，有時候你嘅出現，本身已經正中當區市民嘅心理要求，你唔使點做嘢，佢哋都爭住投票畀你。