美國聯儲局又有委員放鷹，美股隔晚三大指數偏軟，下跌1%，不過反映中概股嘅金龍指數逆市向上，隔晚夜期跟ADR已經偷步炒上。港股今日高開高走，盤中一度升701點，暫受制於萬八大關。
恒指高開260點，升幅曾縮一縮至238點，見17536半日低位，但隨即高開再高走，愈升愈有，最多升701點，見17999，雖未破萬八，但呢一關應該唔難過，反而18200至18400阻力較大。半日恒指收報17964，升666點；國指升276點，報6149；恒科指最勁，升185點，升幅超過半成，中午收3619。半日成交額增至826.4億元，嚟到呢啲位，資金仍然肯買貨，暫時後市仲可以睇高一線。
藍籌股半日整體造好，友邦(01299)半日升4.2%，港交所(00388)更勁，半日升6.1%，但講到金融股最強係平保(02318)，半日升一成；大笨象(00005)最水皮，半日僅升0.6%。至於內銀股今日有資金追捧，但絕對吸引唔到阿Man追貨，最近由幾大國有銀行扯頭纜救內房，向內房揼水，阿Man會視為內銀救人救己行動，畢竟內銀係內房最大債主，內房失救，內銀渣都冇，依家出資打救佢哋，雖然數目遠比所有隱藏負債相距甚遠，但有助內房增強流動性，buy time等個樓市慢慢好返。
內房股要扭轉乾坤，始終都要靠樓市回暖，銷售回升，內房先可以真正走出困局。內房跟物管股因為得到中證監出台支持房企的五項措施，恢復涉房上市公司併購重組及融資，短暫都係對呢批股份有刺激，都係嗰句，追貨免問，免得又做韭菜。
反映中概股嘅金龍指數造好，今日科網股精神，整個板塊向上，美團(03690)因為被騰訊(00700)當特別息派畀股東，早兩日走弱，即使交出理想業績，噚日都要跟個市低開，但落到130嘅美團，即吸引大量買盤掃貨，今日隨大市回勇，半日升8.1%，ATMJ之中表現最好。其他科網股閒閒地升接近4%，阿里健康(00241)成功扭虧，半日升近一成。
噚日都講到明，只要20天線(17182)，50天線(16951)都守得住，後市仍有條件向上挑戰，而20天線今日已順利升穿50天線，第二個黃金交叉出現，只要呢一轉重返18000，再向上突破18400嘅前高位，100天線(18448)成功突破後，下一個目標自然係19000，但留意成交要配合，最好每日做到1200億或以上。
麥狄文
(徐狄怡‧證監會持牌人)
