美國首季GDP終值收縮1.6%，但鮑爺出口安慰，指美國經濟有條件對應貨幣緊縮政策，佢安撫嘅說話，止住美股跌勢，隔晚美股最終靠穩。不過亞太區股市今日普遍下跌，港股早段低開，目前於22000大關增持。恒指低開79點，其後最多跌84點，見21912半日低位，但喺內地股市造好下，港股倒升，最多升115點，見22059半日高位。恒指中午升5點，報22002；國指升16點，報7710；恒科指跌6點，報4931。大市半日成交額692.53億元，周末長假期前成交縮減好正常，缸邊友通常會較為審慎。
中國製造業活動改善，重回擴張水平。國家統計局今早公布，6月份製造業採購經理指數(PMI)升至50.2，比上月升0.6個百分點，但遜於市場預期50.5。呢個數字總算對股市起咗一定支撐作用。
藍籌股半日個別發展，港交所(00388)半日反彈1.4%，市場似乎對中港ETF嘅互聯互通計劃相當受落。其他金融股亦普遍造好，只係友邦保險(01299)半日回吐。而招行(03968)表現較突出，半日升3%。澳門疫情似受控，而內地放寛檢疫隔離要求，市場憧憬澳門亦可快將回復正常，金沙中國(01929)半日升3.6%。近日內房股及物管股有資金收集，中海外(00688)半日升3.3%，創個半月高位。東方海外(00316)半日跌2.7%，係表現最差藍籌股，其實阿Man早喺個幾月前已講過，航運股高峰期已過，隨住下半年航運費回落，相關股份亦會回軟，其至整個行業進入調整周期。
美國商務部較早前再將36間企業新增入黑名單，包括5間中國企業，部分以香港為基地，科網股普遍回軟，ATMJ只有京東(09618)力保不失，騰訊(00700)、美團(03690)跟阿里(09988)半日跌逾1%。眾多科網股之中，最矚目肯定係商湯(00020)，今日剛好上市滿半年，大批機構投資者嘅股份解禁，單係CCASS顯示，中金最近多咗12億股嘅商湯，呢12億股當然係為咗沽貨而轉倉。商湯半日跌44.2%，雖然管理層自願延長禁售期至半年底12月29日，但係持重貨嘅其他投資者似乎唔多理會，完全係要錢唔要貨嘅姿態，大大個賣盤車落去，眼見唔少散貨見急跌排隊買入博反彈，睇嚟都係螳臂擋車，呢啲情況都係咪多手接飛刀。
麥狄文
(徐狄怡‧證監會持牌人)
