噚日揀咗隻恒指牛(69532)出嚟，仲喺朝早10點半左右落場，指數其後一直都係嘆慢板地上行，所以都無乜好強烈意慾要好快手咁掉走隻(69532)，但都set定咗走貨位嘅，就係喺五分鐘圖上如果見到指數失50分鐘線(五分鐘圖10線)或者100分鐘線(五分鐘圖20線)嘅話就走人，失邊條線嚟走人嚟講，都要睇返兩條線嘅距離，如果係近嘅，咁可能失完50分鐘線之後，轉個頭連100分鐘線都失埋架啦；但如果係遠嘅，咁失50分鐘線後就好先行離場啦。
去到下半場嘅時侯，大約2點到尾接近3點，指數先失50分鐘線後再落到100分鐘線前，不過，望望牛熊證街貨圖，牛證新增嘅收回價最貼價為23493點，即係話牛證最貼價層都只係去到23400至23499點，同現價真係爭得實在太遠，係心癢想過夜之際，及至3點，指數向下穿埋100分鐘線，再過多五分鐘確認跌穿，雖然呢個時侯見到保歷加通道口收窄，限制住指數嘅跌幅，不過set策略出嚟就應該遵守返個策略(唔係set嚟做乜？之後再升之後再追嘅啫)。
喺噚日下晝3點至3點5分走隻(69532)，以高低位見過0.075元/0.073元計，平均走貨價為0.074元，呢趟慢活恒指牛Day Trade即日平均賺幅為13格或21.31%。
不過，今朝恒指再升159點開市，報24561點，呢個位將24400至24499點全數殺死之餘，如果將24500至24599點嘅街貨拆開以50點為一層嘅話，咁即係今朝開市指數再殺多逾1200張期指街貨，再上望24600至24699點嗰過千張期指街貨仲喺度，如果將呢層街貨嘅位置套喺日線圖上面嘅話，即係指數要上破100天線以上先可以全數殺死呢層肥熊；而25000至25099點亦都開始儲肥中，反映市場開始有更多資金認為指數累升咗咁多，都係時侯要回一回啦。
雖然指數咁近熊證街貨層，又技術分析 VS 街貨的話，十次有八次都係街貨贏，但今日似乎有少少例外。依家9點55分，指數暫時見到有高開低走嘅情況，又係嘅，Slow SCT(14,3)都已經升咗上去嚴重超買咁耐，回返落嚟少少都係合情合理，只係由於由噚日到依家喺五分鐘圖上都見到指數踩得住50分鐘線(五分鐘圖10線)再上，所以今朝喺作戰室裡面都同大家講可以第一注出淡倉爬格仔，見指數落到50分鐘線時有支持就反手出好倉(今日嘅第二注)追番啲肥熊嚟殺。
其實今日已經有一堆新嘅、貼價嘅恒指牛上市，但無奈地收回價同現價都仲有成600幾點嘅差距，恒指牛(50264)，收回價23746點，同現價有逾685點差距，咪就係市場上最貼價嗰堆牛證嘅其中一隻囉，揀佢係因為佢仲係最高槓桿。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
