星期三(10月13日)颱風圓規終於殺到埋港，仲迫到天文台出八號波出到連港交所(00388)都要宣布全日停市，天文台總算「不負眾望」；再加埋本身係紅日嘅重陽節(14日)，大部份打工 仔無啦啦放咗個孖Day(當然仲有唔少香港人喺八號風球之下都要返工嘅，本小姐以前做記者時，打十號都要返呀！)。今日返一日又再放個weekend兩日，真係變咗消防員更。
星期二(12日)吼隻恒指Put(24356)，喺朝早11點20分至30分吼指數喺五分鐘圖失守保歷加通道中軸以下水平時入，平均買入價為0.1795元。其實睇返五分鐘圖嘅話，當時入(24356)嘅位都確實係麻麻，事關當時條Slow STC(14,3)都已經差唔多到超賣水平，呢個位再入Put，即日嘅話就博條Slow STC(14,3)出超賣再超賣，靠保歷加通道口拓闊然後指數向下再插；貪心鬼就用日線圖下望返條20天線。就當(24356)行如日策略，喺下半場大約1點55分至2點40分接近一個鐘頭裡面，恒指五分鐘圖Slow STC(14,3)都處於超賣至嚴重超賣水平，以期內(24356)高低位做過0.193元/0.184元計，平均沽貨價為0.1885元，呢趟賺幅唔多，有5%左右。
至於打算以日線圖揸隻(24356)嘅話，今朝恒指做完U盤之後開市報25187點，升224點，真係被佢嚇一嚇，唯有set定個止蝕位比隻(24356)，就用返日線圖上嘅50天線，反正都係因為呢條線見有阻力所以先至出淡倉。
依家9點57分，恒指行出高開低走嘅勢走勢，今朝嘅開市價暫時成為今日嘅高位，不過以呢口價計都仲未踏到入熊證第一層，因為第一層熊證街貨喺25400至25499點呢度；而低位暫時為24929點，都係未殺到落第一層牛證24700至24799點。
再去到10點15分，指數補返今朝個開市裂口之後，曾一度倒跌，但其實上落幅度都唔係好高，都只係幾十點嘅事，依家見五分鐘圖上指數一直都處於保歷加上升通道運行，整整下仲橫到個「圓底」出嚟，好彩喺畫之前聊天室戰友問係唔係出牛，都有答到係小注可以出動試水溫，只係唔知夠唔夠手快，食得到這邊廂可以年牛，那邊廂爆咗上去嗰點幾點嘅升幅啫。本來仲想講解埋今日呢個「圓底」有機會變「塔形底」，打完段字之後已經變咗出嚟嚕，爭在指數上破條頸線成唔成功啫。
嚟到10點37分，指數終於都成功上破咗「塔形底」，見小時圖今日嗰兩粒燭暫時都企得穩喺保歷加通道中軸之上，不過Slow STC(14,3)就已經被搶高至超買水平，出好倉追指數再上的話都要留意住Slow STC(14,3)走勢，最安全當然係吼Slow STC(14,3)落返去超賣位時先至出啦。
恒指牛(60343)，收回價24600點，同現價有逾550點差距，約44倍槓桿都夠DT玩。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
聊天室/Patreon：https://www.patreon.com/cbbcwar
Facebook：https://www.facebook.com/cbbcwar
