星期六(10月9日)打完一個天下太平嘅八號波之後，又話有第二個風叫圓規開始形成緊，仲話最快今晚定聽日(12日)會喺香港800公里附近，由於個預測路線真係好鬼近香港同澳門，已經有講定話一旦成形。風力會好似當年山竹咁勁，大家都要小心啦！
上個星期五(8日)喺【下半Part】時提過可以再喺隻恒指牛(55308)身上報仇，若然有按策略嘅話，尾市抽高嗰一下都可以爬到格仔；但如果揸埋過weekend的話，今朝恒指升323點開市，報25161點，隻牛都已經變肥，再留意到街貨圖，見熊證重貨區其實只係喺25200至25299點，以今朝開市價嘅位置向上再殺埋呢堆重貨真係易如反掌，所以喺聊天室上都有同戰友們講定可以開市後追一注好倉爬格仔，反正今朝五分鐘圖Slow STC(14,3)都未上到超買區。
依家9點44分，恒指最高暫時做過25363點，換言之恒指已經將熊證首三層街貨全部殺晒，呢三層合共有1650張期指，最貼價層上移至25300至25399點，呢度都有655張期指，為熊證最多新增街貨層。
再過多4分鐘，喺五分鐘圖上見指數開始有高位有轉落嘅情況，Slow STC(14,3)兩線回落亦同步中，今朝聊天室嘅好倉爬格仔亦告收工；貪心鬼喺呢啲時侯出淡倉，博Slow STC(14,3)出Swing trade的話，可以吼一吼恒指小時圖，因為依家10點7分見小時圖上Slow STC(14,3)兩線上到超買水平，同時今日出咗嘅嗰兩粒小時圖燭，剛好升到250小時線(小時圖250線)附近，不過仲未能夠上破(截至10點12分為止)，當然，小時圖上Slow STC(14,3)係可以出嚴重超買，甚至超買再超買，咁就要睇返五分鐘圖當50分鐘線(五分鐘圖10線)追到上去指數時，會成為支持定阻力啦。
留意返，恒指上周日線圖上上破10天線同20天線，依家目標作勢向50天線出發，同步都見到Slow STC(14,3)由之前超賣水平回升到目前超買範圍，吼日線圖唔破50天線出淡倉+Slow STC(14,3)超買回落返而更淡定同更有勝算。如果你係打算咁樣玩嘅話，恒指Put(24356)，行使價25000點，低引伸，槓桿適中，不過就真係要等日線圖上到50天線時再觀察阻力強度，同埋Slow STC(14,3)肯唔肯回啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
聊天室/Patreon：https://www.patreon.com/cbbcwar
Facebook：https://www.facebook.com/cbbcwar
