隔晚美股先低後高，雖然美國上周新申領失業救濟人數意外增加，但投資者對經濟前景仍感樂觀，三大指數收市回升。不過樂觀還樂觀，唔少美股好大都認為，美股喺今年稍後時間或出現超過15%大幅度調整，而事實上美股估值又確係唔算平，總之目前入場玩美股都要步步為營。至於港股真係弱過藥煲，噚日彈唔夠500點，今日又嘔返兩嚿幾出嚟。
恒指高開17點，開市價27740點已經係半日高位，開市後持續向下，跌穿10日線(27639點)，半日最多跌324點，見27399點。恒指中午收報27448點，跌275點；國企指數報9903點，跌103點；恒科指更大跌2.2%，報7325點，跑輸大市。好彩半日大市成交額695.3億元，沽壓唔算好嚴重。
重磅藍籌股全部跌超過1%，港交所(00388)更跌3%，友邦(01299)則跌1.4%；批股後嘅藥明生物(02269)跌2.8%，喺批股價附近爭持。不過比亞迪(01211)逆市升2.7%，成為最大升幅藍籌股。
滴滴先斬後奏去美國上市，換嚟極大代價，除咗叫車app已勒令下架外，有消息指公司將面臨當局史無前例嘅嚴厲處分，除咗巨額罰款外，更被逼要喺美國退市，隔晚喺美股股價插水11%，令港股呢邊嘅平台股受壓。ATM算唔跌得多，阿里(09988)僅跌0.1%，睇嚟200蚊呢個大支持位都頂得吓；騰訊(00700)跟美團(03690)分別跌0.7%及1.4%。二線平台股比較大鑊，嗶哩嗶哩(09626)被大行調低目標價，半日跌8%；話咗穿250元大位嘅快手(01024)係深不見底，會落地獄，今日又創新低，半日插9.1%。平安好醫生(01833)則趺至逾一年低，半日跌4.8%。
內地河南省水災，市場憧憬災後重建需要大量金屬及建材，相關股份炒起，不過都係搵個藉口炒作。都係嗰句，唔好追急升股，尤其市況反覆，要買股就等回調時揀優質股買。好似體品股咁，可能炒到咁上下又要調整，不過無厘頭成個板塊急跌，仲要喺奧運開幕日嚟咁搞，都唔知攞景定贈興，阿Man就吼位安踏(02020)，博佢今日之內落去166元回補6月17及18日嘅上升裂口，若然補咗裂口又守住條50日線(約167)，可以買少少博反彈，跌穿160止蝕，博佢重上180水平都有得諗。
麥狄文
(徐狄怡‧證監會持牌人)
