熱門:

2021年4月14日 港股直擊 即巿股評

【輪證贏家】放中石油入watch list

噚日輸咗隻恒指牛(61877),唔緊要,及時止蝕同埋知道自已輸咩就得啦(最忌係連輸咗都唔知咩事啫!)

今朝恒指開市再嚟多個裂口向上,升近300點,開市報28910點。依家9點57分,返到公司開晒所有機,順便斟埋杯水之後,恒指升幅擴大至升441點,做緊28939點,喺五分鐘圖見到恒指今朝開市稍回後,就踩住保歷加通道頂再向上走,SlowSTC(14,3)兩線都上到90以上嚴重超買水平,不過,有保歷加通道口持續拓闊嚟幫條SlowSTC(14,3)隨時出超買再超買,幸好今朝喺巴士上於聊天室留言話「快手即追好倉可以,安全可以等恒指五分鐘圖Stc回落時先出淡倉」,的確,策略唔難,有幾熟手就靠個人經驗啦。

恒指一下子就隊咗上去,呢個時候未落場嘅就只可以等住分鐘圖上嗰五條平均線追返上嚟之後再睇位入場。趁呢個空檔,睇睇個恒指牛熊證街貨圖先。

今朝都有同聊天室嘅戰友睇過,由於當時未開U盤嘅關係,用噚日收市價28497點嚟量度,根本就係踩住牛證第一層街貨28400至28499點,呢度屬新增街貨層,得14張期指咁大把。或者個市嫌佢少得滯,明明踩住都唔下殺,方向上彈高400幾點走去熊證第一層28900至28999點先安落,都啱嘅,事關呢層有相當於398張期指,以截至依家10點7分恒指最高做過28979點計,呢一層都所剩無幾;BTW,恒指唔殺晒佢全家,留個活口然後再向下行嘅話,你都只能夠「睥」一聲回應。

呢兩日本地商場同收租股似乎瞓醒,合理嘅,多得林鄭助攻:打疫苗就有飯開、有酒飲、有關過,九龍倉集團(00004)、九龍倉置業(01997)同領展(00823)都仲keep得住噚日嘅升勢,不過呢堆股份喺輪證場上屬冷門資產,所以對炒輪證嘅人嚟講,觀賞用吧!

另外,今日見汽車股好似有啲計,但日線圖上就有啲嫌比亞迪(01211)遇20天線($177.76)出阻力,而吉利(00175)就喺10天線($20.086)浮浮沉沉,都係放入watch list度先。

花咗少少時間搵過一堆個股之後,終於都搵到呢期好似無乜人講嘅油股,唔係中海油(00883)喎,因為日線圖上中海油處於五條平均線以下水平,今日隨市升都仲要受制於10天線($8.091),就算SlowSTC(14,3)勢頭上行中,但都...唔係咁鍾意。

「唔會係中石化(00386)掛?」係中石油(00857)呀!日線圖上見中石油其實都係處於10天($2.785)以下水平,不過,由於中石油嘅SlowSTC(14,3)處於超賣水平位置,比中海油,甚至前文提及嘅比亞迪同吉利還要低,相對地提高中石油嘅值博率。再者,喺日線圖上中石油作勢出「雙底」,頸線水平剛好同20天線($2.844)差唔多,呢鋪細細地上10天線都當你贏!

睇過中石油五分鐘圖都知,根本無可能好似指數或者大價股咁有一條好smooth嘅走勢圖,唯一退到可以參考到嘅就上到30分鐘圖,依家見中石油30分鐘圖SlowSTC(14,3)兩線已經上到超買水平,其中一條%K線數值仲頂盡100添,再去到小時圖個情況相約,可以先等SlowSTC(14,3)回至超賣水平先落場。

用得30分鐘至小時圖就真係要比多少少耐性,中油Call(23690),行使價$2.81,同現價有1.4%價外,10月底到期,引伸同槓桿都適中,低街貨,成交活躍。

未有機會出手的話,咪放入watch list度先囉。

作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。

MeWe/Patreon/FB/IG:輪證贏家
秒投聊天室:輪證教室

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads