噚日成功咗隻恒指熊(51312)嘅Day trade,平均賺幅有20%;而喺聊天室臨收市前15分鐘講底騰訊(00700)牛證可以小注過夜一試,因為見佢收市前5分鐘圖嘅SlowSTC(14,3)兩線落到嚴重超賣水平,且有作勢由低位向上,結果今朝雖然恒指微跌1X點開市,但騰訊就逆市上行,至9點半至後騰訊愈升愈有,但於見好就收嘅大前題下,今朝早聊天室嘅朋友都有份全餐食吓。
依家10點56分,今日公司的確有啲忙,到依家先叫做有啲時間打到呢隻稿,見開咗市個半鐘頭到,恒指高低波幅只有160點,窄到根本就算有機會做swing trade,都無肉食;鏡頭再轉去騰訊嘅5分鐘圖,今朝上行後見SlowSTC(14,3)到超買位,即市聊天室再開騰訊熊,到10點47分喺聊天室再叫大家收隊,然後成個市就好似時間停頓咁,同無郁過根本就無分別,悶死。
依家11點3分,終於都有時間望一望牛熊證街貨,其實今朝未開市前睇過一次,應該係無乜變化,牛證最貼價層為23600至23699點,呢度有相當於1296張期指。咁重肥牛都唔食真係...食咩呢?
但就算開佢淡倉,都要等條5分鐘圖嘅SlowSTC(14,3)落返嚟先得,或者今日都係悶住過一日就算。
作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。
FB/秒投聊天室:輪證贏家