熱門:

2020年2月19日 即巿股評 港股直擊

【輪證贏家】恒指波幅指數準備反彈

第16日home office,以往星期一至五要返工時就成日嗌唔想返工;好啦,就嚟「放」足一個月咁滯,依家又成日諗:「幾時先可以『返工』?」人就係咁矛盾。

恒指今朝低開43點後,至依家9點59分出現倒升,做緊93點,報27624點。日線圖上恒指處於50天線(27734點)同250天線(27677點)以下,暫時見頭頂附近位置仲有條10天線(27623點),而20天線(27048點)就做住嗰支持,換言之恒指都總算叫做仍然處於保歷加上升通道。

至於下方技術走勢方面,SlowSTC(14,3)明顯見到%K線喺高位跌穿%D線;14RSI則處於中軸水平;DMI嘅ADX就繼續勢頭向下,暗示大市呢期都係無乜力。

見到ADX無力,忽發奇想諗起條恒指波幅指數(VHSI),無他嘅,大市如果無力行,即數點走位上唔多,亦即係波幅細,VHSI正好量度恒指嘅波幅,望望個圖見到依家VHSI處於17.23,呢個位對比之前嚟講就唔算低嘅,但VHSI嘅SlowSTC(14,3)就見到已經處於嚴重超賣水平,剛好%K線仲喺低位升穿%D線添。

若然將ADX同VHSI一齊比較,前者呢期走勢向下,暗示大市無力;後者反映大市波幅愈嚟愈窄。無力 > 波幅細 > 合理。試想想如果ADX同VHSI都同時由低位向上反彈,即大市會有力度產生一個較大嘅波幅出嚟,蓋VHSI嘅SlowSTC(14,3)嚴重超賣見反彈,分分鐘呢一浪喺短期內隨時冚到埋身;用番技資版嘅術語:悶局或短時間內打破。

留意番,講緊嘅只係悶局打破,從來都無講過倒底係向上打還是向下打,因為ADX同VHSI唔係用嚟量度大市方向嘅指標。所以應該睇埋恒指牛熊證街貨圖。

今日所見熊證有三層新增街貨層,最貼價位置已經落返去27700至27799點,呢度有相當於245張期指,重貨區比噚日預計嘅28000至28099點還要高多一層,喺28100至28199點,有相當於993張期指;而牛證最貼價層仍然都係27400至27499點,呢度有相當於756張期指,仍然都係牛證街貨重貨區。

依家10點15分,恒指升幅擴大至升131點,做緊27662點,牛熊街貨中間位就係(27499+27700)/2=27599.5點。雖然目前見到牛證街貨量的確比熊證嘅多,但如果今日大市上行的話,亦唔排除有短炒資金入貼熊,博大市無力再度下行而火速執一轉,如是者又將近熊街貨儲肥。

同步地近牛重貨瀨死唔走嘅話,再按目前牛熊街貨差距愈嚟愈窄,再再預期假設ADX同VHSI所反映大市可能會出現大波幅之下,上下其手、牛熊通殺都唔係無可能(即係單日轉向之嘛,唔係咩特別嘢嚟架)。

知道浪衝埋嚟但重點係唔知佢衝向上定衝向下呢個先麻煩,若然是但企一邊嘅話,咁同買大細係無分別,與期係咁,倒不如買包花生算啦。

作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。
電郵:[email protected];FB:輪證贏家

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads