熱門:

2020年2月18日 即巿股評 港股直擊

【輪證贏家】準備迎接業績期

第15日home office,坦白講有啲掛住公司部電腦,真架,喺屋企用部私伙13吋MacBook Air,對比公司嗰部駁住兩個大芒嘅陳舊Window,你話邊部睇得舒服啲啦;仲要呢兩日咁凍,用MacBook嘅人都會知道,呢啲天氣用個keyboard打字,係特別凍。(凍都要做架啦,home office咗咁耐我已經好幸福架啦)

恒指升咗兩日之後,今日終於都見下行,今早開市報27766點,低開193點;依家9點55分,恒指跌幅擴大至跌290點,報27669點,最低暫見27638點。目前嘅位置係處於「終極黃金交叉」之下,係呀,今日50天線(27706點)升穿咗條250天線(27681點)啦;同場加映條10天線(27551點)升穿咗條20天線(27472點),「短期黃金交叉」出現。

睇埋牛熊街貨圖。經過噚日升穿28000點呢個位之後,熊證街貨層最貼價已經升至28000至28099點,呢度有相當於412張期指;至於牛證街貨方面,今日見最貼價層仍然都係27400至27499點,但呢度已經儲到有相當於999張期指,亦係牛證嘅重貨區。計計牛熊街貨中間位(27499+28000)/2=27749.5點,對比10點1分恒指報27684點,兩者只係相差65.5點。

睇返噚日隻恒指牛(64042),噚日嘅【輪證下半part】喺下半場未開始時就好已經打咗兩段仔字上去,除咗係噚日比較忙之外,另一個原因係有讀者留意到上半場完場之後,恒指5分鐘圖SlowSTC(14,3)落到超賣位置,如是者的確可以準備喺下半場開始時,繼續留意住SlowSTC(14,3)水平,務求吼個靚位落場。

就以下半場開場後10分鐘,SlowSTC(14,3)5分鐘圖上處嚴重超賣水平計,(64042)當時高低位做過$0.045/$0.042,平均買入價為$0.0435。期後於1點40分至2點30分呢段時間,恒指5分鐘圖SlowSTC(14,3)其實已經重上超買至嚴重超買位置,(64042)當時高低位分別為$0.053/$0.046,平均賣出價為$0.0495,一計之下一個下晝即日鮮賺13.8%,以目標賺個下午茶嚟計,都已經達成啦。

依家10點13分,恒指今日似乎愈跌愈有咁款;不過今日市場焦點應該係滙控(00005)業績。參考番早排美國銀行股公布嘅業績,按年表現有進步,估計滙控業績都未至於太樣衰;然而,坊間預測滙控去年列帳稅前盈利都會錄得微升,若然業績出爐後升幅係高於預期嘅話,再加上目前滙控股價處於60零蚊呢啲位,股息都仲有一定嘅吸引力,望就望條10天線($58.6)有力做支持啦。

對滙控業績無興趣?唔緊要,反正業績期都準備展開,往後每個星期都總有幾隻焦點股公布業績,揀啱先埋檯啦,老細!

作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。
電郵:[email protected];FB:輪證贏家

放大圖片

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads