熱門:

2019年12月11日 港股直擊 即巿股評

【盤房來料】小米公司回購挾爆沽空淡倉

美股隔晚表現反覆,但美股仍然表露其強勢,雖然早段有消息指中美貿易談判或有阻滯,雙方角力期間,不斷試對方底線,但其後美方有官員指雙方仍坐定定喺談判桌,美股跌幅大大收窄,港股夜期亦由跌轉升。不過有消息指中美推遲本月中生效加徵關稅,港股低開高走,重上26500水平。

恒指低開26點,開市後跌幅擴大至72點,都只係72點咁上下啫,見過半日低位26364點,始終守住喺26300水平。其後止跌回升,重上10日線(26426點),半日最多升93點,見過半日高位26530點,中午接近高位收市,報26522點,升86點;國指中午報收10447點,升52點。

今日市場焦點係小米集團(01810),半日成交達21.8億元,係今早最活躍港股。集團推出5G手機,加上進軍日本市場,市場睇好其發展,盤中一度被搶高近8%,高見9.94元,中午報收9.86元。講真阿Man一向對小米冇乜好感,主要係管理層管治方面水準麻麻,尤其係以低價增發新股贈予管理層及員工,對其他小股東唔多公平。不過咁,小米去到10倍樓下嘅PE,又確已回到合理水平,加上喺8.5元水平橫行咗一段頗長時間,而唔少未有睇好小米前景嘅小米淡友,一直累積小米空倉。而公司最近持續出手回購,利用公司資金托住股價,終於今日一鋪過挾爆淡友。留意係小米喺10至10.3元阻力唔細,短炒喺10元前要食糊亦無可厚非,小米要正式轉勢,必定要突破10.3元並企穩,咁就擺脫之前長期橫行悶局,繼續向上挑戰12元,而12元為下一重磅蟹貨區。

內房股維持近日強勢,大部份內房股皆有資金追捧,當中表現最突出係剛完成配股嘅美的置業(03990)。美的置業完成配股,其實配股早已為市場預期之內,而細摩即發表報告撐美的置業,指集團目前估值吸引,加上擁有「準國企」特質,喺較低嘅融資成本及對人民幣貶值敏感度相對較低之下,較具有防守性,維持予其「增持」評級,目標價34元。因為細摩撐到出報告,股價扭轉早段跌4.7%跌勢,其後拗腰倒升8%,中午升6.3%。內險股亦有不俗表現,睇嚟市場對中美貿易談判甚有信心,預期人民幣可以靠穩甚或回升。

港股呢幾日都係炒股唔炒市,指數仍然窄幅上落,下面支持位26200至26300守得幾穩,而上面26600至26700有一定阻力,喺本周日中美貿易談判所謂唔再係死線嘅死線之前,港股都唔會有太大突破。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads