阿曼灣昨日有油輪遭突襲,油價升逾2%,但隔晚美股懶理照升,道指升過百點,除大摩上調迪士尼目標價17%至160美元撐住過市外,當然依然喺炒下周憧憬聯儲局減息,但市場依然凶險,小心希望越大失望越大!
下星期聯儲局減息機會微
先講聯儲局議息,唔好認為下星期白鴿局一定會減息,從統計睇到,市場估計6月19日聯儲局會議減息機會(圖一)只得24.5%,維持息率不變機會是75.5%,市場相信聯儲局最快減息出現會在7月31日的議息會議,估計減息機會高達83.4%(圖二),維持息率不變僅16.6%。
另一個值得留意是,近期中美貿易戰只有美國出牌,中國好忍得住手,暫時未有大動作還擊,但近日商務部表明短期內公布「不可靠實體清單」,似乎準備出手還拖,對大市會造成一定震盪,尤其美國企業。
除此之外,昨晚晶片商博通(Broadcom)業績對科技股好有前瞻性,原因是不單止季度收入差過預期,同時調低全年收入預測8.2%,即拮爆下半年晶片業回暖的美夢,博通盤後插8.5%,連累其他科技及晶片股亦瀉,所以唔好對後市咁大期望。
全球新股亂咁炒
市況惡揾食,已上市的股票大家都知有幾多斤兩,尤其大股投行全部Cover,向上炒難過登天,但有概念的新股就唔同,你、我、他甚至投行都知D又唔知D,美國人造肉Beyond Meat就喺好例子,雖然昨日回落0.4%,但仍比招股價25美元高4.65倍。
另一隻美國觸目新股CrowdStrike(代號為CRWD),主打雲端安全軟件,孭住「雲端」兩個字已相當Juicy,2015年更有Google旗下,前身Google Capital的CapitalG做股東,背景相當猛料,故此周三晚開閘掛牌當日就狂升70.6%,昨日再升16.5%,收67.56美元,比招股價34美元高98.7%。
講到新股,香港又點會執蝕,十足有Beyond Meat味到的中煙香港(06055),業務屬香港罕見,上市前就超購101倍,當然以招股價上限4.88元定價,上市後即炒上,今日最高見過9.2元,遠高招股價88.5%,但地球喺有地深吸力,加上估值對比同業離地(詳細可留意今日EJ MARKET) ,最終收造6.87元,倒跌8.9%,但仍高招股價40.8%。至於今日掛牌的內地製藥公司翰森製藥(03692),全日收19.5元,較招股價14.26元高36.8%。
總括來講,新股異動,市場甚有黃雀亂飛格,尤其港股成交唔多,而全球新股炒到㷫烚烚,要買上去最好細細注,又或者做好對沖,例如一值睇淡的費城半導體指數或賭業股。
編按:作者尹德政(Ricky),醉心投資美股近十載,最大滿足感來自尋找抵買有實力的世界行業領袖,每逢周三、五在「信報網站」及「港股360」撰文,另每逢周二在《信報》撰寫「政觀其辯」。