噚日情人節希望大家過得開心啦,喺我身邊嘅朋友之中,最開心應該係戰友Jack同佢太太,事關條友仔噚晚收工就直奔機場,兩公婆齊齊坐夜機飛去日本;雖則戰友Jack越洋過海個目的就係為咗打橋牌比賽,而佢太太就梗係去開心Shopping,不過總算係去旅行玩呀。
噚日朝早揀咗兩隻恒指牛出嚟,分別有進取嘅(68609)同埋安全嘅牛(65999)。兩隻牛仔喺朝早10點15分至11點10分時,吼到恒指5分鐘圖嘅SlowSTC(14,3)處於超賣水平落場嘅話,呢個時候進取嘅(68609)高低位分別係$0.05/$0.04,平均數就係$0.045;至於安全嘅(65999)同期高低位就做過$0.101/$0.091,平均數就係$0.096。
臨近上半場完之前,彭博出咗條新聞話「美國考慮將上調中國商品進口關稅期限延長60日。」,刺激番個市向上。為咗做到Day trade,喺下晝1點55分至2點30分,見到恒指5分鐘圖嘅SlowSTC(14,3)上番超買位時就索性將(68609)同(65999)走人。呢段時間(68609)高低位$0.057/$0.049,中位數就係$0.053,即日賺17.8%。至於(65999)嘅高低位就做過$0.109/$0.101,中位數就係$0.105,即日賺9.375%。
今朝睇新聞見日經跌200幾點,都知今朝恒指實樣衰,裂口低開191點,開市報28241點,落返去250天線(28327點)樓下。依家10點5分,恒指暫時最低做過28084點,幾乎連條10天線(28078點)都無埋。但日線圖上又見到其實10天線同250天線差距愈嚟愈窄,再出多個「黃金交叉」亦唔係難事;況且按恒指由1月頭至今形成「上升通道」,依家只係回返落去條「上升通道」底部,你會唔會視為一個「吼低開Call」嘅位?
不如睇埋恒指牛熊證街貨圖見講。依家10點6分,恒指做緊28064點(連10天線都無埋Lu...)下方最貼價嘅牛證27900至27999點有相當於2079張期指,當中有超過一半喺噚日先至落場,按頭先mark底咗嘅恒指點數28064點計,若然個市向下殺落多164點嘅話,就可以啪晒呢2076張期指;再比多100去落,即27800至27899點,呢度亦都有742張期指喺度,唔算少架。
至於上方熊證街貨最貼價嘅係28500至28599點,呢度得745張期指啫,同現價比嘅話就相差成535點,無計啦,鬼叫個市一嘢向下啪咗成300幾點咩。
咪咁早博反彈住,現價同下方牛證實在太近啦,且又多街貨,若然佢下行食牛嘅話,又即係連條「上升通道」都跌穿埋,好可能又會係另一個玩法架啦。(28000點無咗啦~)
作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected];Weibo[下半part]:#Gladyshan#