喺周末期間，美國已放風，兩國元首只要通個電話，就有可能延長3月1日中美貿易談判嘅貿易死線，而侵侵噚日再表示，只要貿易磋商取得良好進展，將考慮延長調高中國貨入口關稅率限期，市場對貿易戰將於上半年結束甚為樂觀。加上共和民主兩黨就達成初步協議，有助避過政府再度停擺，刺激美股做好，隔晚三大指數均升逾1%。值得留意係標指亦已成功突破250日線(2732點)，美股呢隻老牛仍有機會活下去，只要三大指數能夠企穩喺牛熊分界線上面，美股或重新注入活力，當然都要睇美國企業盈利表現，能唔能否交到似樣成績表。
恒指今早高開13點，一度倒跌10點，見28160點半日低位，之後喺內地股市強勢下，接近中午升幅突破200點，最多升246點，見28417點，抽穿250日線(約28351點)，再創五個半月高。恒指中午收報28397點，升225點；國企指數報11165點，升120點。
愈嚟愈多缸邊友都話個市升到開始懷疑人生，已有言論開始談論港股係咪已經由熊轉牛，其實阿Man向來都係強調，話之佢牛定熊，總之就係跟住個勢，即使港股之前仍未重返250日線之上，但由1月初低見24500水平回升以嚟，港股都係以大漲小回模式向上推進，若然仍然受熊市陰影所蒙蔽，未敢入市或更甚逆市做淡，跟市場對著幹，咁即使係身處熊市，但面對超級大反彈，做淡友一樣輸到甩褲。
港交所(00388)更上一層樓，得到大行祝福，目標價更大幅調高至340元，並建議增持，噚日急升後，今日再錄得近3%升幅，短線有望挑戰280元目標價。或者大家見到其股價急升唔想高追，待股價回吐至252元附近，回補今早上升裂口吼位買入，跌穿10日線245元止蝕。
唔少重磅股都已起步兼且升咗一段日子，暫時最落後應該內銀股，不過中美貿易談判成功達成協對機會大增，呢個影響內地經濟表現嘅最大不明朗因素威脅有望解除，而阿爺又一直推維穩措施，內銀股料可受惠。參考番2008年金融海嘯後，內地推出4萬億元人民幣刺激經濟方案，內銀股一直反覆向上。而踏入2019年，人行透過降準向市場釋放1萬5千億元人民幣資金，市場憧憬今年放水行動陸續有來，相信內銀股似早會後來居上。選股方面都係有大買大，以建行(00939)及工商銀行(01398)兩大龍頭優先，前者現價往績市盈率6倍，息率近5厘；後者現價市盈率6.2倍，年息率4.9厘，咁嘅數據當然仲係好抵買。
麥狄文
(徐狄怡 ‧ 證監會持牌人‧ 大錦證券有限公司董事)
