上周五美股續升，侵侵簽署臨時支出，令已停擺35日嘅聯邦政府恢復運作，對美股當然係正面消息。而中美雙方更高級別官員將會本周見面，中國代表團今日抵達華盛頓，為中國副總理劉鶴本周訪美進行經貿磋商做準備。加上踏入業績期後，大部份派成績表嘅企業，總算交到功課，凡此種種都唔畀淡友有反擊機會。不過美股期貨今早喺新加坡黑期見回吐，港股高開後有些少腳軟，暫未能一舉升破27800大關，升幅一度收窄至不足50點，見過半日低位27617點。半日恒指報收27684點，升115點；國指則報收10934點，升61點。
重磅股普遍上升，騰訊(00700)果然向住350元目標逼近，半日最高見349元，中午報收347.2元，升近1%。平保(02318)愈戰愈勇，果然係大追落後，半日高位74.85元，幾乎完成阿Man所定嘅短線目標。至於其他中資金融股亦見資金追捧，喺阿爺暫時放鬆銀根下，呢個板塊短期可以睇好一線。
美滙指數一直於97水平樓下徘徊，市場預期美息短期難以再向上，美滙指數回落至95.7，反而人仔滙價轉強，今日升至6.74水平。之前阿MaN講過人仔轉強，內地航空股可以睇高一線，三架紅色飛機又的確幾生性，半場升幅由1.5%至3%不等。至於手機設備股反彈持續，阿Man一向唔贊成高追，呢一刻繼續選擇靠邊站。
除咗手機設備股追唔過，阿Man認為內地汽車股彈得更無厘頭，明明內地進一步開放市場，只會令內地汽車股面對更大競爭壓力，長遠嚟計呢個板塊都係棘手，話阿Man硬頸都好，睇少一個板塊唔參與最多贏少啲，好過買錯追貴貨。
港股由月初至今博命升，唔覺唔覺累計升幅已接近3000點，嚟到現水平，唔少缸邊大又心思思想開put，情況一如上周恒指升穿27000關一樣。好老實人民幣持續博穩，就算大市未完全擺脫熊蹤，牛市重臨，但暫時個勢咁硬淨，都唔係時候開淡倉。尤其仲有兩日期指結算，估計都唔會畀機會淡友喘息。況且今日殺咗27500至27799呢批熊證之後， 大市回吐力度有限，加上27800樓上嘅熊證街貨有增無減，即使大市挾到淡友已開始懷疑人生，但仍有淡友未死心。
其實以勢論勢，大市仍然有上升空間，話唔定可以挑戰埋條250日線(28527點)，而日線保力加通道持續擴闊，升勢有餘盡。上周五恒指成功上破去年12月高位阻力27260點，高收27569點，又的確係幾大突破，若然呢個星期可以企定定喺27500點水平之上，可以算係上年10月底24540點及今月初嘅低點24896點，做咗對高低腳出嚟，突破埋雙底頸線。月線圖方面，只要呢幾日能夠企喺27000水平，月線圖即形成穿腳破頭嘅利好形態。無論技術指標抑或市場氣氛都唔畀淡友有反擊機會，既然係咁梗係順勢而行，咪再問個市幾時跌，同可以做淡未喇！
麥狄文
(徐狄怡‧證監會持牌人)
