有關中美貿易談判訊息混亂，花旗商務部長羅斯呢頭話跟中國要達成協議條路仍相當漫長，要以英哩又英哩去計，但「侵侵」又口口聲聲話雙方好快好快有協議，可能侵侵咁樣講，係要分散注意力，令人忘記因為佢對美墨邊境圍著嘅執著，導至美國聯邦政府停擺超過1個月，已再三有專家警告，政府停擺將拖累美國經濟表現，甚至令經濟出現負增長。隔晚美股腳軟，但晶片股做好，三大指數個別發展。
雖然美股表現唔算精壯，但港股隔晚喺夜期及ADR表現快人一步，多得騰訊(00700)再有兩隻新遊戲獲批，其股價上升撐起指數，令恒指隔晚已偷步殺上27200水平之上。恒指高開161點，開市後升幅一度收窄至96點，半日低位僅見27217點，能夠守住27200水平再發力，升穿周一高位27323點，最多升406點，高見27527點。恒指中午報27483點，升363點；國指半日報收10848點，升157點。半日成交額略有回升至576億元，以周末前夕嚟講都算唔錯。
騰訊再一次喺340元前頂住，始終上面355元所遺下嘅下跌裂口唔嘢少，要回補呢個裂口，除非有相當強勁買盤支持。除咗騰訊幾乎所有重磅股都做好，反而早兩日受捧嘅公用股，今日見有啲回氣。之前阿Man講到明平保(02318)將接力，呢幾日平保又確係行得快咗，中資金融股表現唔錯。
5G概念股愈戰愈勇，中國鐵塔(00788)回氣後今早再發力，見1.76元上市新高，半日升逾4%，市場憧憬5G發展，將進一步帶動高端智能手機的強勁需求，手機設備股急彈，兩隻龍頭舜宇(02382)及瑞聲(02018)，半日分別升5.9%及2%。其他手設股全線落鑊。阿Man則認為手設股落鑊硬係要同5G扯上關係有些少勉強，即使5G發展最終帶動手機升級熱潮，講緊仲要一段時間，兼且連華為創辦人都話5G條發展道路，相對4G艱難唔會好似以前咁平坦，咁搞法即使5G設備如中國鐵塔及中通服(00552)先受惠，都未有耐輪到手設股得益。
至於今日有個別內房股落鑊，慎防係資金搵嘢炒，見內房股呢期較為落後炒一轉，話晒內房股債務問題嚴重，估值又唔算特別平，高追免問，又係當睇佢唔到穩陣。至於指數今日嚟到27500水平呢個位，幾乎將27100至27699之間嘅熊證街貨殺得七七八八，大戶為咗殺熊而挾嘅淡倉亦接近夠晒數，今日再進一步上升機會唔大，加上周末前夕，有糊先食。
麥狄文
(徐狄怡‧證監會持牌人)
