依家9點42分,順利返到嚟公司確實萬幸,事關我又遇上一個「喜歡急剎車」嘅巴士司機,今日佢再嚟「急剎車」,我差啲由車尾仆到車頭,好彩我老爺喺前面頂住我啫!
噚晚收市後收到消息話騰訊(00700)終於有兩隻game approved;哈哈,等咗咁耐、望穿秋水、頸都長埋終於佢都得咗啦,騰訊好就恒指好,恒指好就恒指Call(11718)好架啦,依家9點48分,(11718)輪價做緊$0.037,最高做過$0.038,以之前計落嘅平均買入價$0.0325同現價計,賺幅即係有13.85%。夠唔夠cover之前友邦熊(女人係記仇架,OK?),還是已經多買蘿蔔糕,定你仲想買埋芋頭糕,今鋪真係悉隨尊便啦。(我自己嚟講,今鋪比上鋪友邦熊係大注咗啲啲啲嘅,所以乜仇都報晒架啦!)
啱啱出完個Push話恒指升逾300點,升至27400點樓上,為三個月高位,依家9點58分,恒指最高做過27465點,即係話27100至27199點、27200至27299點同埋27300至27399點呢三part嘅熊證全數死亡,呢度夾埋有成1396張期指。講過坊間係有發行商嘅牛熊證街貨圖data拆到最細以50點為一層計嘅,咁就可以睇埋27400至27449點呢50點,就知呢度有相當於1145張期指,以恒指暫時做過嘅高位計,呢part嘅熊證其實都已經被打靶,加埋上去嘅話,total有2541張期指。望望月曆下個星期三(1月30日)就期結,跟手就準備迎接農曆新年,怪不得咁趕時間係咁夾啲熊仔啦,夾到扁晒。
Well,依家10點9分,恒指仍然企喺27400點附近徘徊,日線圖上恒指SlowSTC(14,3)超買超買再超買就唔駛講啦,而今日裂口高開嗰吓確係跳起咗,兼同條150天線(26976點)開始有啲距離,會唔會向250天線(28545點)邁進就暫難講,不過條10天線(26959點)就真係向住條150天線出發;同時下方20天線(26311點)都跟住10天線上行,五條主要平均線由重新順序排列嘅跡象。
「咁即係又多一個利好走勢出嚟啦,如是者仲有無得再向上彈?」若然大家仍然睇死27500至27599點嗰1861張期指準備用嚟祭一祭個市嘅話,恒指Call(11718)仍可取,仍然吼5分鐘圖見超賣先好落場。
作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected];Weibo[下半part]:#Gladyshan#