熱門:

2019年1月18日 港股直擊 即巿股評

【輪證贏家】肥上瘦下

哈哈,噚日個市跌完升> 升完再跌,搞到收市後成個stock list都係見紅,唯獨一隻無事嘅就梗係喺倉底嘅友邦熊(66189)啦,雖則噚日埋單計隻嘢升八成幾,Top20排行第二,幾威呀;但用(66189)最高價$0.022計,都仲同本身計出嚟嘅平均買入價$0.0375輸四成,唔通真係「投降輸一半」?結果就係一句:「算啦,咪鬥氣啦,總好過你見佢幾日都係$0.01先啦」嘅情況之下就將(66189)止蝕。

都啱嘅,鬥氣唔飽肚嘅,見恒指今日個市再彈過,恒指又穿27000點,依家9點59分升327點;友邦(01299)最高暫時見過$70,如果繼續鬥氣嘅話,(66189)就R.I.P.啦。(《信報》分析員強強噚日Whatsapp我話「中左就係老闆」,而我回佢一句「中咗先講啦」;假若隻(66189)就真係輸咗比暫計高位$70同打靶位$69.88仲間個$0.012嘅話,我諗我應該想殺人多過想做老闆。)

就姑且開開恒指牛熊證街貨圖睇吓到底有幾強嘅街貨將條恒指再扯多轉。今日張圖同早幾日都係差唔多,亦同啲公司嘅人工/福利都係一樣,四個字:「肥上瘦下」!上方熊證最貼價嘅係27100至27199點,呢度有相當於767張期指,至於比較近嘅重貨區就係喺27200至27299點,呢度有1126張期指,怪不得恒指會升成1%向上殺熊。

「下方牛證真係一啲肉都無咩?」唔係喎,只係未夠近同未夠多咋喎。下方第一梯隊嘅牛證喺26500至26599點,呢度有相當於781張期指,當中有592張係噚日湧入嚟嘅,都證明開始有資金見個市仲有得上咁就調轉槍頭追牛。之前有講過依家「超買再超買」其實係行緊一個loop,只有下方牛證數量多同近先至有機會吸引個市反方向下行。既然下方最貼價牛證開始有比較多嘅資金流入,即係暗示呢個loop有開始完嘅先兆(只係一個好少好少嘅先兆咋,過兩日放完假返嚟再上過都仲可以)That's why我見勢間有更加多嘅人話「準備等跌啦」(而呢句真係聽咗一個星期有多,我就係早入諗住早享受,點知原來早入唔止輸兩舊嘅buyer)

依家10點24分,恒指最高做過27110,叫做一度升穿咗條150天線(27075點),依家雖然處於150天線之下,但如果恒指個勢係要再上,且唔食晒啲熊證街貨唔罷休嘅話,咁下一個目標好可能就係條250天線(28640點)。

作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected];Weibo[下半part]:#Gladyshan#

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads