熱門:

2019年1月11日 即巿股評 港股直擊

【盤房來料】大市高位整固 周末前較淡靜

美股連升五個交易日,雖然中美貿易談判結束,雙方各自發嘅聲明都係冇乜料到,未見任何協議具體內容,美方更表示若然雙方未能喺3月1日限期前,完全達成協議,將向中國餘下2000億美元進口商品額外徵收關稅。美股早段有啲腳軟,但市場樂觀情緒開始蔓延,加上就業市場表現唔差,零售市道睇落又幾好,美股其後回升,三大指數繼續做好,帶動港股隔晩喺夜期跟ADR成功攀上26600水平。

不過今早表現較為反覆,恒指高開170點,見過半日高位26692點後急急腳掉頭,更一度倒跌至半日低位26494點,但100日線(26416點)仍守,目前喺26500至26650點之間窄幅上落,高位進行整固。半日恒指報收26570點,升49點;國指報收10412點,報收17點。半日成交額得番480億元似乎又回復淡靜,港股連升幾日,累計升幅已逾千點,加上周末效應,港股進入悶局亦好正常。

重磅股又係靠騰訊(00700)撐起半邊天,半日高位334.6元,剛好係阿Man之前預測,其股價企穩喺310元之後,短線目標價大約330至335元,今日剛好達標。其他重磅股以一對蘋概股孖寶瑞聲(02018)同舜宇(02382)較有睇頭,不過智能手機過咗換機upgrade高峰期,除非5G發展突飛猛進侷住再換機,否則今年手機股及手機設備股都係有波幅難有升幅。

人民幣近日走勢強勁,雖然大部份專家都人仔升勢難以持久,大方向貶值難免,只係貶值速度喺美滙指數近日轉弱下放緩,不過人仔暫時就係升緊,離岸價及在岸價兌美元均升穿6.8。人仔回勇有利航空股,之前阿Man都講咗中資航空股可以繼續炒上,今日三架紅色飛機升勢持續,升幅由3.6%至5.6%不等。

除咗航空股之外,人仔回勇阿Man認為可留意紙業股,心水當然係兩隻紙業龍頭玖紙(02689)同理文造紙(02314),噚日兩股已見起步,今日升勢持續,現價追入仍有水位,畢竟之前股價拾級而下,現價仍然處於年內低位附近,估值偏低,至少可以試番條100日線上面。

大市方面都唔使點睇,今早已見今個短線升浪嘅第三個裂口,即日未轉向亦要抖抖,暫時短線支持位喺26400點,上面阻力26800點。經過呢個星期大挾淡倉之後,牛熊證街貨仍然側埋一邊,熊仔街貨殺埋26600-26699呢個重貨區,又迎來26700至27000點呢一段,大戶仲有冇心再挾上殺熊,要睇有冇消息配合。值得留意係下星期二米字旗國進行脫歐協議票決,一旦國會否決協議,要硬食無協議脫歐的話,定必對金融市場帶嚟一場震盪。

麥狄文

(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads