熱門:

2023年8月21日 港股直擊 即巿股評

【盤房來料】內房債務接連爆雷 港股只有捱沽陪葬

美股上周五期權結算,美股先低後高,道指轉跌為升,倒升25點,標指則微跌不足1點;納指跌幅收窄至26點。標指已跌穿4400-4450第一支持位,下一個支持位為4300-4350,睇睇嗰個位有幾大支持。業績期過去,市場焦點開始轉去年度央行嘅Jackson Hole會議,會議嘅內容將會為9月議息留下線索。不過反映中概股表現嘅金龍中國指數上周五又唔爭氣,跌逾3%,當晚已拖累夜期跟ADR跌至17800水平。

人民幣持續走弱,內房負本消息不絕,上周五內地三大金融巨頭,包括人行、中證監、金融監管總局齊齊開會,落實支持及如何化解金融風險工作會議,市場預計再下調LPR為內房提供更低融資成本,豈料LPR下降幅度未如預期。港股喺六個交易日累計跌近1300點,今日跌勢持續,恒指一度跌逾300點。

恒指低開152點,人行公布8月LPR(貸款市場報價利率),一年期LPR利率下調0.1厘,至3.45厘,5年期以上利率則維持不變,市場原先預期下調15個基點,由於下調幅度未如市場預期,大市愈跌愈多。恒指最多跌319點,見17631半日低位,更創去年11月29日斤9個月新低。其後跌幅略為收窄,跌幅更一度收窄至83點,見17867半日高位。其後沽壓再加劇,半日恒指跌247點,中午報收17703。國指半日跌80點,報收6066;恒科指半日跌49點,報收3957,重返4000水平之下。半日成交額552億元。

藍籌股普遍下跌,當中以剛公布業績嘅東方海外(00316)跌7.4%表現最差,中期盈利少賺八成,其實阿Man唔意外,疫情期間航運股嘅盈利周期由高位回落,盈利倒退除咗因為之前高基數,航運費亦因疫情過去回復正常。內地減息力度雖然遜預期,但減息都係會拖累金融股息差收窄壓力大增,而人民幣持續走弱,亦影響人民幣資產價格,今日中港金融股無一倖免,全部下跌。兩內險龍頭平保(02318)跟國壽(02628)齊齊跌3%;內銀股普遍跌1%以上,招銀(03698)更跌2.8%,跟友邦(01299)跌幅相約。而大笨象(00005)半日跌0.4%算跌得少,其他本地銀行全部跌幅超過1%,因市場憂慮內房債務問題,或拖累埋本港銀行。至於科網股唔算跌得多,係小米(01810)跟百度(09888)半日跌逾2%叫跌得多少少,騰訊(00700)、美團(03690)跟阿里(09988)半日跌逾1%,京東(09618)半日則跌少於1%。

一如阿Man所料,恒指失守多條移動平均線後,上月反彈結束,再開始新一輪跌浪,暫時已跌至2023年低位,但喺人民幣持續弱勢,以及內地未能就內房債務問題搵到有效解決方法嘅情況下,港股只有陪葬捱沽,短線支持係17500及17300點,若然反彈未能重返18000水平企穩,並重上18300點之上,港股跌勢持續,繼續向下尋底。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads