上周五美股偏軟，人民幣再度轉弱，令中概股喺上周五表現麻麻，港股喺當晚夜期跟ADR同樣偏軟，預示今日港股要繼續調整。不過暫時港股喺100日線(19532點)附近爭持，暫時未有太明顯方向。恒指低開64點，一度跌187點，見半日低位19352，其後跌幅收窄並倒升42點，見19581半日高位，10日線(19645點)連影都唔見。恒指半日報收19535，跌4點；國指半日跌5點，報收6727；恒科指半日跌11點，報收4485。成交額水至431.06億元，與其話好淡爭持，不如話買賣兩閒。
科網股業績期將至，科網股今日個別發展，但普遍窄幅上落。騰訊(00700)跌1.1%；阿里(09988)本周三公布業績，半日倒升0.5%，美團(03690)亦力保不失，京東(09618)亦升0.8%，但百度(098888)跟網易(09999)半日則跌少過1%。金融股同樣各行各路，港交所(00388)半日跌1.2%，平保(02318)半日跌0.8%，大笨象(00005)跟工行(01398)及建行(00939)半日無起跌，友邦(01299)就逆市升0.4%。
內地醫藥股繼續就腐敗問題進行整治，簡單講要打貪，醫藥股繼續捱沽，翰森製藥(03692)半日跌一成，為表現最差藍籌股。不過板塊內其他股份沽壓更大，唔少跌超過一成，而閒閒地都跌半成或以上。
阿爺上周表示要以組合拳推動經濟，結果出嚟竟然係叫全民皆股，但韭菜一早被割至體無完膚，民間仲邊有咁多錢可以投入股市，市場一再憧憬阿爺推出更具體嘅救市方案，可惜都係得個桔，尤其係一直處於水深火熱嘅內房股，苦無對策，債務問題無從解決，內房股咁彈一兩日又打回原形，今日碧桂園(02007)跟碧服(06098)半日又分別跌6.6%及7%。至於三桶油則隨油價反彈上好，不過三桶油都係隨油價上上落落，最大嗰段升幅早早行完。阿爺再再再度鼓勵消費，內需股今日做好，海底撈(06862)半日升4.4%，藍籌之中表現最好，百威(01876)亦升逾3%。飲飲食食都算基本消費，但喺民眾收入減少，失業率高企下，其他消費品就慳得就慳，所以李寧(02331)跟安踏(02020)呢啲今日都升唔起。目前內地經濟下行，消費降級，今日就有官媒再重提地攤經濟，為咗谷返起個經濟，唯有睇餸食飯，但見到咁嘅情況，真係唔知內地幾時可以回復疫情前嘅繁榮，香港情況如是。股市係反映經前景，暫時睇唔到好景，難怪中港股市亦係無乜大起色。
麥狄文
(徐狄怡‧證監會持牌人)
