美國被信貸機構調低評級，美債息上升，令美股偏軟，但三大指數跌幅溫和，VIX隔晚一度高見17.42，但收市又去返16樓下，即係市場唔算好恐慌。標指至今已有近七成公司公布咗業績，整體表現唔錯，市場對企業下半年業績有較高期望，令美股高居不下。不過目前美股嘅估值略欠吸引力，可以持有，不能加碼。至於夜期跟ADR就急升，因為阿爺噚晚預告，今早發改委召開發布會，介紹「打好宏觀政策組合拳」，港股連跌三個交易日，跌逾600點後，今早一度反彈逾400點，不過半場升幅削半，但就成功修復10日(19566)及100日線(19536)。
恒指高開250點，升幅一度擴大至436點，見19857半日高位，但其後升幅收窄至86點，見19507半日低位，但10日線跟100日線失而復得。半日恒指報收19612，升191點，守住10日及100日線；國指半日升94點，報收6746；恒科指半日4492，升86點。半日成交額693.47億，但高開低走，又係持貨者趕位食糊走人嘅格局。
藍籌股以科網股最醒神，主要係隔晚反映中概股表現嘅金龍中國指數升逾3%，今日ATMJB全線做好，京東(09618)半日升3.1%，美團(03690)跟阿里(09988)半日升逾2%；騰訊(00700)升0.3%最無用，百度(09888)跟小米(01810)半日升逾1%。單係呢堆科網股已佔過半數恒指升幅。金融股個別發展，平保(02318)半日升近3%；大笨象(00005)反彈接近2%，友邦(01299)半日跌0.7%，繼續弱過人，其他內銀及內險股表現一般，招行(03968)半日升1.5%至叻仔；港交所(00388)半日則升0.6%，重上320水平。
所謂組合拳講嚟講去都係要活化資本市場，利用資本市場去供水畀整個經濟體系，銀行要保持流動性充裕，到尾一句就係有水有得搞，冇水搞唔掂。其實口講無用，即使講到民間資金有幾大潛在購買力，但要活化資本市場，係要靠大量外資流入，單靠內部資金，塘水滾塘魚，能夠活化到都未必強化到。至慘係過去幾年，民間資金一而再，再而三被割韭菜，割到連根拔起，仲邊有咁多民間資金可以支持到，呢個正正係未入場投資者嘅疑慮。
麥狄文
(徐狄怡‧證監會持牌人)
