熱門:

2023年4月20日 港股直擊 即巿股評

【盤房來料】港股乏方向二萬水平之上整固

美股業績期,美股表現反覆,不過唔少公布業績嘅股份,即使低開,但最終跌幅都能夠收窄,反映美股有資金願意趁低吸納。至於港股未能打破悶局,不過經過兩日回吐414點後,半日反彈些少,暫時喺50天線(20285)及10天線(20439)附近上落,高低波幅不足200點。

恒指低開12點,其後回升最多104點,見20472半日高位,但A股偏軟,拖累港股向下,最多跌59點,見20308半日低位後喘定,成功守住50天線。恒指半日收20407,升39點;國指升15點,報6904;恒科指升20點,收4114。半日成交額只有505.09億元,交投持續淡靜。

藍籌股個別發展,中芯(00981)再創52周高位,半日升近4%,藍籌之中跑第一。ATMJ又係京東(09618)最唔爭氣,半日跌0.13%,自劉強東減持以嚟,京東股價持續疲弱,咁又好難怪市場唔肯入場買貨,連大股東都減持,街外人對公司又點會有信心。至於騰訊(00700)於黃金周期間,成人玩手遊時間都設限,但股價今日未見再大跌,半日反而升0.4%,但未知能夠重返360元近日支持位。

阿里(09988)近日好消息不絕,一時又話改革重組搞業務分拆,一時又話螞蟻終完成整改兼罰款大減,但股價都未能重返紅底,能夠守住90元支持都叫唔錯。至於美團(03690)呢兩日強咗少少,今日股價重返140元水平,半日升3.4%,風水輪流轉,之前一直捱沽,家吓跑返贏ATJ三股。

資金繼續追捧濠賭股,憧憬4月賭收表現理想之餘,5月黃金周繼續丁財兩旺。金沙中國(01928)半日升3.3%,表現好過銀娛(00027)的升不足1%。內險股延續噚日升勢,今日繼續造好,國壽(02628)跟平保(02318)半日分別升2.1%及接近1%。友邦(01299)被摩通下調投資評級,半日跌1.5%。至於內房股跑輸大市,板塊內股份全線下跌,龍湖(00960)半日跌4.4%,藍籌之中包尾。

全球最大電動車公司Tesla公布業績,表現麻麻,毛利率跌一半都好嚇人,美股收市盤後股價急跌6%,拖累呢邊嘅電動車股全線下跌,當中以比亞迪(01211)算跌得少,其他電動車股跌超過2%至7%不等。官媒指中國6G研究領域取得進展,中資電訊股靠穩,相關通訊設備股表現唔錯,中興通訊(00763)升5.3%,長飛光纖(06869)升6.6%,中通服(00552)升1%。

港股繼續無乜方向,喺二萬水平之上整固,可惜成交一直唔配合,令大市未能進一步向上突破,但今日A股嘔晒泡,港股都無乜點跟跌,明顯係有心人托住個市,指數波幅細到咁,跟本無乜好睇,未到周末已可提早收工。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads