隔晚美股先跌後回升，但美滙指數回升，港股向下，即使內地首季GDP增長優於預期，恒指半日仍要跌逾百點。
恒指低開139點，不過內地GDP公布勝預期，大市跌幅一度收窄至只有40點，見20742半日高位。可惜高位無以為繼，港股又回復跌勢，半日最多跌192點，見20590半日低位，不過恒指仍守住多條移動平均線。半日恒指收報20626，跌155點；國指報7006，跌49點；恒科指跌54點，跌幅1.3%跑輸大市，收4199。半日成交額660.8億元，跟上日變動不大。
藍籌股整體向下，友邦(01299)跌0.4%，大笨象(00005)半日跌1.5%，港交所(00388)則半日跌1.1%，中移動(00941)亦跌0.3%。內銀股偏軟，但內險股逆市向上，主要係太保(02601)上月保費收入上升4%，股價半日升4.1%，平保(02318)跟國壽(02628)分別逆市升2.9%及3.3%。
雖然隔晚反映中概股嘅金龍指數向上，但今日港股呢邊嘅科網股則全線下滑。騰訊(00700)視頻晶片量產投用，但股價仍要下跌，半日跌2.2%。阿里(09988)跟美團(03690)分別跌0.6%及0.7%；京東(09618)持續疲弱，半日跌1.5%。百度(09888)自從文心一言發表後，股價表現無好過，近日歐洲多國對Chat GPT使用加以管制，相關AI概念股受壓，百度亦唔例外。
至於另一AI概代股商湯(00020)被阿里減持，股價半日再跌2.1%。之前阿Man都提過，即使睇好AI概念股，寧願揀美股嘅相關概念股都唔揀港股呢邊，就算一定要揀港股嘅AI概念股，寧取百度、騰訊或阿里，亦唔會揀商湯，主要係商湯收入持續兩年倒退，科企唔賺錢燒銀紙唔緊要，但收入愈玩愈縮，咁就講唔通。
體品股今日表現麻麻，皆因安踏(02020)噚日升得好地地之際，突然宣布以噚日收市價折讓8.8%配股，股價半日跌7.4%，雖然守得住配股價，但藍籌之中表現最差。其他體品股亦受拖累，半日普遍下跌，只有361度(01361)逆市升1.9%。
港股雖然從19800反彈，一步一步上到嚟，亦成功收復多條移動平均線，但始終未見新錢流入，無法支撐大市進一步向上，但有心人亦唔想畀個市碌落去，形成目前唔上唔落嘅現象。港股一直無法吸引資金流入亦可以理解，外資一直減持，即使目前估值唔係貴，外資都唔願坐貨，除咗係唔想再承擔過多嘅政策風險之外，中概股近日借好消息炒高，就見大股東出貨減持，又或者係炒起配股抽水，呢啲割韭菜嘅舉動，亦令缸邊友反感，短炒趁回吐買貨博炒三兩日仲有得諗，想長線資金入場坐定定，真係有難度。
麥狄文
(徐狄怡‧證監會持牌人)
