隔晚美國公布嘅零售銷售數據，反映經濟衰退有機會升溫，加上市場憂慮衰退令原油需求下降，油價回軟，影響投資氣氛，美股隔晚由升轉跌，三大指數向下，納指亦結束連日升勢，跌逾1%。港股隨美股低開，恒指低開225點，早段跌幅曾收窄至82點，之後再度擴大至294點，見21383半日低位。
不過，恒指10天線(21507點)失而復得，大市落一落10天線又見買盤跟進，雖然成交唔多，但至少沽壓亦有限。港股拗腰向上，最多升49點，見21727，但中午收市又再略為回落。恒指中午收報21672，跌6點唔夠；國指跌17點，報7323；恒科指跌51點，跑輸大市，收4473，跌幅超過1%。
藍籌股個別發展，科網股僅騰訊(00700)跑出，先跌後回升，再創超過七個月高位，最高見384元，半日穩守380水平，收382.4元，升0.6%。美團(03690)就十連跌，今日再跌1.4%，喺騰訊股東接收美團可能沽貨嘅陰影下，美團呢期弱過藥煲。不過美團去年第四季已成功扭虧，只要今年交到份見得人嘅成績表，美團嘅弱勢或者係一個收集作為中線投資嘅機會，阿Man會等過咗年再睇睇，係咪要搵個位收集。
至於京東(09618)跟阿里(09988)，近日出現此起彼落嘅現象，雖然阿里今日有啲腳軟，半日跌咗1%，但相對半日僅跌0.6%嘅京東，呢兩個月係阿里遠遠跑贏京東嘅，主要係因為唔少機構投資者見阿里最壞時候已過，尤其馬雲逐步退出後，阿爺亦唔再針對阿里，以估值嚟比較，阿里現水平又真係抵買過京東，難怪有機構投資者換馬，pair trade之下，買阿里沽京東。
金融股今日只見友邦(01299)反彈0.7%，幫手頂住個指數，其他銀行股跟內險股偏軟，大笨象(00005)嘅RSI爆晒標，就算唔大幅向下，點都要回返少少或橫行去修復一下啲技術指標，但半日僅跌0.1%都算係強。至於噚日好威猛嘅創科(00669)打回原形，紅底不保，係因為有大行下調其評級及目標價，半日跌4.4%，噚日藍籌之中跑第一，今就由尾數上去第一。港交所(00388)跌咗個幾星期，噚日股價落到廿天線見支持，今日果然就反彈，重上360元水平，港交所死唔去，意味大市亦唔會死得去邊。
雖然騰訊表現甚為勇猛，但其他科網股就表現麻麻，除美團錄得十連跌外，其他科網股普遍下跌。快手(01024)見有股東減持，股價半日插水半成；網易(09999)、百度(09888)跟嗶哩嗶哩(09626)，全部跌逾2%。
今日內房股跟CRO股跑出，內房股整體反彈，物管股亦有進帳；板塊內股份升1%至3%不等。至於CRO股同樣反彈，板塊內股份閒閒地升返2%或以上，不過生化股花多眼亂，阿Man就專注睇住幾隻大行較為睇好嘅龍頭股，包括信達(01801)同康方(09926)，其他次一線股份，升得急時回得更急，唔係阿Man杯茶。
半日成交額縮水至508億元，北水今日開始收爐，預計今明兩日成交未必可以維持喺1200億元之上，暫時恒指仍守10天線，睇個款好友未肯放手，且看下星期農曆年過後，大市能否喺期指結算前再下一城，兔年再挑戰二萬二水平，暫時就算覺得值博率低唔買貨都無問題，但要坐住淡倉過年假，似乎略欠說服力。大市高位震動整固，唔等於要急跌。
麥狄文
(徐狄怡‧證監會持牌人)
