美國隔晚公布12月份CPI，通脹按月錄得兩年半以嚟首次回落，之前市場已預計聯儲局會放慢加息步伐，如今個CPI見頂後開始回落，市場進一步憧憬至年底或者有減息空間。美股隔晚反覆向上，三大指數上升，納指更連升五個交易日，標指企穩3900水平，道指升逾200點。至於港股今早表現較為反覆，恒指噚日創六個月高位後，今早動力明顯減弱，盤中更曾倒跌，半日保住小量升幅。
恒指高開90點，一度升137點，見21651半日高位，未能進一步突破噚日高位21698後掉頭回落，不過最多都係跌39點，見21474半日低位後靠穩，重上21500水平。恒指半日報收21549，升35點；國指升7點，報收7319；恒科指今日繼續跑輸，半日跌2點，報收4485。半日成交額只有653.3億元，愈接近農曆年長假期，預期成交會繼續縮水。
藍籌股個別發展，重磅科技股呢兩日已見腳軟，AMTJ只有阿里(09988)半日仍保持升幅，但都只係升0.4%，半日報收111.3元。騰訊(00700)噚日跌得較為顯著，今日靠穩，半日升0.1%，但已無法重上365元之上。美團(03690)呢幾日維持弱勢，半日再跌近2%，報收169.6元，短線支持170失守；京東(09618)則跌2%，半日報收242.4元，留意240元支持失守或見更大幅度調整。
重磅科網股腳軟，由其他指數重磅股撐住大市，大笨象(00005)升1.8%，重上55元水平，不過大笨象由48元起步升上嚟，遺下幾個上升裂口，暫時要睇住54元前阻力能否企穩，掉頭向下穿54元，分分鐘要落去逐個口回補。中移動(00941)半日亦升近2%，同樣突破55元，54元變成短線支持，可以睇住呢個位止賺。中移動一直被視為大市藍燈籠，藍籌升到佢通常都係尾水，不得不小提防。紐約期油再升逾1%重上每桶78美元，帶動三桶油向上，中海油(00883)股價見四個月高位，半日升逾2%；中石油(00857)更升近3%，半日報收3.86元，中石化(00386)升少於1%，始終油價上升，中石化唔係最受惠，反而會增加成本。至少其他藍籌股以網易(09999)半日升3.1%表現最好；而信義光能(00968)半日跌超過半成，表現最差。
醫藥股今日表現亦唔錯，香港上市生物科技指數急升3.1%。藥明生物(02269)升2.9%；康方(09926)升3.6%；信達生物(01801)升2.6%。諾輝健康(06606)發盈喜，刺激股價半日急升逾一成，而同樣升逾一成嘅生科醫藥股都唔少，計有榮昌生物(09995)升10.4%；心通醫療(02160)升13%；和黃醫藥(00013)飆11.6%；康寧傑瑞(09966)升10.4%。
愈接近農曆年長假，成交將會愈見淡靜，目前港股喺現水平停滯不前，高位震盪，會否出現久守必失仲係未知數，畢竟成交縮減，大戶要操控指數更為容易，唔排除呢段時間喺一千幾百點內舞高弄低，暫時都未係可以進取嘅時候。
麥狄文
(徐狄怡‧證監會持牌人)
