美股隔晚先升後回,主要又係有聯儲局官員放鷹,指今年都唔會減息,道指跟標指倒跌,只有納指保持66點升幅。至於港股噚日再升近400點,創近六個月高位後,今早表現反覆,目前喺21300水平爭持。
恒指低開17點後,一度倒升7點,見21395半日高位,但嚟到21000樓上,始終買盤唔會積極,大市由升轉跌,最多跌200點,見21187半日低位,其後跌幅減半,喺21300水平徘徊。中午恒指收報21316,跌72點;國指跌33點,報7252;恒科指跌31點,收4539。半日成交額只有729.81億元,相對上日減少,仲有個幾星期又到農曆年長假,睇嚟放假前嘅呢段日子,交投只會愈來愈淡靜。
藍籌股普遍向下,大笨象(00005)跌近0.3%,友邦(01299)跟港交所(00388)半日齊跌0.8%;AMTJ全部報跌,騰訊(00700)先創今個月高位365.8元,半日倒跌0.2%;京東(09618)跟阿里(09988)齊跌0.6%;美團(03690)繼續跑輸,跌1.5%。股神未有停手沽比亞迪(01211),比亞迪高開低走,半日倒跌2%,雙紅底股價得而復失。
至於濠賭股半日繼續向上,為咗鼓勵更多旅客到訪,澳門周五起推「買去程送回程」車船票優惠,整個板塊繼續炒。金沙中國(01928)半日升3.4%,銀娛(00027)升得最少,半日僅升0.1%。永利澳門(01128)、美高梅中國(02282)、澳博(00880)跟新濠(00200)半日則升逾4%。留意龍頭銀娛開始有心無力,喺市場消化通關利好消息後,小心呢個板塊急回。
手機設備股逆市落鑊,噚日急升逾一成嘅丘鈦(01478),今日未見回吐,仍保持1.2%升幅;板塊內升幅最大係高偉電子(01415),半日升逾半成。龍頭舜宇(02382)半日升4.6%,成為升幅最大藍籌股;其他手設股普遍升逾1%。
今日多隻股份配股抽水,難免令阿Man覺得呢一個由上周二展開嘅升浪,已接近尾聲,呷哺呷哺(00520)今早錄大手上板,傳遭新加坡基金悉數減持,半日插7.4%;中教控股(00839)折讓8.8%配股,半日跌3.8%,仍守住配股價。先聲藥業(02096)折讓8%配股,半日跌3%,同樣守住配股價。嗶哩嗶哩(09626)計劃發行ADS,集資超過34億,半日跌4.6%。
恒指已連續四日喺保力加通道頂徘徊,若然今日重返保力加通道頂21371之下,並開出陰燭,就會出現短期見頂訊號。既然目前大市已接近本輪升浪尾聲,有貨喺手不妨減減磅,趁稍後回調再尋找機會。
麥狄文
(徐狄怡‧證監會持牌人)