隔晚美股假期後表現偏軟，雖然道指仍錄得37點升幅，但標指高開低走，跌15點；納指跌幅更超過1%，跌144點。唔少人仲放緊假，過兩日又新年，成交薄弱，喺缺乏買盤支持下，自然易跌難升。標指已失守3900大關，好友唯有退守3800，目前美股去向仍然要睇息口何去何從。
債息回升，美股科技股表現弱過藥煲，但中概股喺內地落實通關消息下，表現強硬，只不過中概股升勢唔夠全面，Tesla跌跌不休，電車股三傻跟跌，其他中概股升勢唔算顯著，只有出行股表現較強。A股沒有聖誕假期，過去兩日內地股市上升，只係升勢唔算強勁之餘，成交亦唔算暢旺，深滬兩市成交未及萬億，可見入場資金唔算積極。
至於港股，受通關消息所帶動，重上二萬大關，升至四個月高位，半日更一度升逾500點。恒指高開194點，見19787已經係半日低位，其後見買盤入場，未幾大市已升穿二萬，半日最多升506點，見20099高位。中午恒指收報20011，升418點；國指報6815，升162點；恒科指收4236，升111點。半日成交額715.57億元，以半日升幅嚟講，咁嘅成交只可以話過得去，又唔算特別多。
藍籌股普遍造好，藥明生物(02269)半日升8.1%，係表現最好藍籌股。內地通關在即，市場憧憬內地經濟復常後回勇，內銀股跟內險股造好，工行(01398)跟建行(00939)半日升逾4%，平保(02318)半日則升近3%。至於ATMJ未見特別強勁，半日升幅2%左右。
汽車股表現特別差，Tesla喺美股嗰邊跌到一仆一碌，跌跌不休，拖累其他汽車股走軟。蔚來(09866)大幅下調第四季度交付預測，中午急跌9.1%，其他兩傻小鵬(09866)跌8%、理想(02015)跌6.2%；比亞迪(01211)跌0.7%算跌得少。其他傳統車股亦下跌，吉利(00175)跟長汽(02333)半日分別跌2.6%及2%。就連4S汽車股亦走軟，中升(00881)半日跌3.3%，成為表現差藍籌股。
雖然內地落實下月8日全面通關，但內房股跟物管股逆市下跌，始終債務問題只見治標，未能治本，內房板塊能否起死回生，仲要睇之後嘅銷售數字，加上未再見阿爺有任何政策出台解決目前內房困局，內房物管股半日普遍下跌，唔少股份跌幅超過半成。除咗內房股表現疲軟，假期前落鑊狂炒嘅教育股，假後整體下跌，閒閒地跌半成，更有個別股份跌逾一成，之前阿Man都講過，呢啲股份唔係話唔可以炒，但炒得要有心理準備大上大落，食少多教訓，阿Man寧願食花生。
期指明日結算，喺結算前夕大市推高轉倉，加埋年結因素，呢兩日港股企到高位，但結算過後再加埋年結完成，過埋除夕新年假期，下周能否繼續高企成疑問，阿Man呢一刻唔打算追貨，反正大市真係要再上，總有機會，反正過埋呢個星期，又係新一年開始，成年流流長，就算個市要再升，又點會無機會買貨，急亦唔急嗰一陣，二萬大關相信會有一番爭持，點會咁容易話企就企定定。
麥狄文
(徐狄怡‧證監會持牌人)
