隔晩美股顯著下跌，主要係市場再受加息困擾，除咗日本央行略為擴闊利率波動區間至0.5%之外，歐洲息口亦調高至3.5%，德國10年債息再創高位，喺全球緊縮貨幣政策下，加上美國第三季GDP增長終值好過預期，美股投資者憂慮美國加息步伐增速，聯儲局可能又再放鷹。美股三大指數隔晚下跌，道指更一度跌800點，尾市跌幅收窄至348點，標指則跌55點；納指則跌逾2%，跌233點。隔晚港股喺夜期跟ADR再度失守10日線(19441)，拖累今早恒指低開，但10日線失而復得。
恒指低開296點，早段跌幅曾擴大至298點，見19380半日低位，但恒指跌穿10日線後，A股止跌回升，港股亦收復10日線，更扭轉跌勢倒升7點，見19686半日高位，不過假期前夕，缸邊友買貨又點會積極，最終半日恒指報收19578，跌100點；國指則跌73點，報收6642；恒科指則跌80點，報收4129。半日成交額只有444.23億元，買賣兩閒。
藍籌股普遍下跌，但中港兩地通關之聲高唱入雲，有消息指下月初中港兩地將落實免檢及免隔離通關，友邦(01299)半日升3%，市場憧憬通關後，友邦中國業務可回復活力。近日美股嘅科技股顯著跑輸大市，隔晚連反映中概股嘅金龍指數亦強勢不再，ATMJ半日下跌，騰訊(00700)跌0.4%算跌得少，阿里(09988)跟美團(03690)半日跌1.5%，京東(09618)跌幅更遠過2%。阿里健康(00241)半日跌5.5%，藍籌之中包尾。其化藍籌股乏善可陳，年結前夕表現麻麻，其實由10月低位反彈咗咁多，大市能夠喺萬九水平做個年結都算過得去。
美國Tesla倍增當地買車折扣，隔晚股價插水近9%，走勢每況愈下，龍頭唔精神，其他電動車股全線腳軟。比亞迪(01211)盤中曾跌半成，半日跌幅仍達4.4%。蔚小理三傻，跌幅由2.8%至4.4%不等。汽車零部件股亦下跌，主要係美國國會參議院金融委員會要求當地8個最大汽車製造廠商，審查中國零部件供應商對其供應鏈影響。
今日最突出嘅板塊係教育股，繼續由劣幣驅逐良幣，當中嘉宏教育(01935)半日急升23.9%；中國科培(01890)創52周高，半日大升一成半。其他教育股閒閒地升半成以上，都係嗰句，高追免問，食少多教訓，純做觀眾睇表現一定無損失。
2022年只剩餘三個交易日，下周四期指結算，呢兩日期指轉倉高峰期，轉倉活動下，港股唔多跟外圍股市走，當其他股市跌到一仆一碌，港股仲守住條10日線，都係受期指轉倉活動所影響。若然聖誕節過後外圍跟內地股市繼續插水，當大戶完成轉倉後，港股出現追跌亦唔意外，長假前都係唔好手多多。
麥狄文
(徐狄怡‧證監會持牌人)
