熱門:

2022年12月22日 港股直擊 即巿股評

【盤房來料】炒內房預咗輸先好入場

美國消費信心指數升至8個月高位,加上Nike季績好過預期,反映美國零售銷售市道唔係咁差,隔晚美股造好,三大指數回升,港股今日繼續反彈,更重返10天線(約19475)之上。

恒指高開376點,報19537,開市已成功收復10天線,升幅雖然一度收窄至315點,見過19475,剛好去到10天線又見買盤吸納,恒指再度走高,最多升574點,見19735半日高位。中午恒指收19688,升528點;國指升209點,報6710;恒指科升185點,報4210。半日成交額576.66億元,相對噚日有所增加,喺假期逼近之際有咁嘅成交額,已經算唔錯。

藍籌股幾乎全線造好,半日唔上唔落嘅中銀香港(02388),無起跌已經係表現最差。隔晚反映中概股嘅金龍指數升逾3%,今日幾隻重磅科網股自然擔起推高指數嘅重任。ATMJ又係京東(09618)跑出,半日升逾6%;美團(03690)緊隨其後,半日升5.7%;阿里(09988)跟騰訊(00700)分別升4.8%及3.9%。大市一反彈,港交所(00388)例牌造好,半日升3.1%;就連大笨象(00005)跟友邦(01299)都分別升1.3%及1.1%。

內房股近日持續出嚟批股抽水,缺水情況仍然嚴重,阿爺再出招救內房,中國證監會表示,支持房地產市場平穩發展。不過光打嘴炮意義唔大,用行動支持會實際啲,旭輝(00884)獲執行董事及控股股東增持合共100萬股,半日揚4.5%。其他內房股亦見反彈,只係相對配股後遇到嘅沽壓,反彈力真係麻麻地。想博呢個板塊無話唔得,只係有心理準備一覺瞓醒,撞正自己買咗貨嘅公司配股,一下就唔見一成或以上,預咗輸先好入場。

內地自調整咗防疫措施後,雖然確診數字直線上升,但未見大量重症出現,民眾生活開始回復正常,唔使郁啲就要封區封城,對內地餐飲股嚟講係好事。今日板塊內股份炒高,海底撈(06862)半日升近9%,成為最大升幅藍籌股,其他餐飲股全線向上,當中以呷哺呷哺(00520)升14.1%表現最強。

都係嗰句,呢兩日係期指轉倉高峰,加上聖誕節長假臨近,即使大市見反彈,唔代表結算後有條件大力再爆上,反映期指轉倉推高嚟轉,下個月開局更加要小心,19000點樓上值博空間大減,都係等放假之後,甚至結算過後,下月開局再作部署,呢幾日都提早收爐,齋睇唔入場炒。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads