美國最近嘅通脹數據放緩，鮑爺又放咗鴿，不過製造業活動自2020年5月後首度收縮，市場都仲係擔心有機會經濟衰退，加上今晚有非農數據公布，隔晚美股個別發展，市場態度較為審慎。不過目前通脹經過聯儲局幾度進取加息後，通脹已初步受控，就業市場穩定，而零售市場唔係太差嘅話，美國經濟陷入衰退機會較低。
至於港股經過周一短線見底回升後，至噚日高見19000水平得而復失，開始進行回調整固，今日進一步向下回調，暫時仍守100日線(18381點)之上，不過100日線將會係回調首個目標。恒指高開48點，最多升104點後無以為繼，未能重返19000點，其後大市轉跌，半日最多跌205點，見18530，離100日線仲有段距離。半日恒指報收18612，跌123點；國指跌39點，半日報收6344；恒科指半日靠穩，報收3843。半日成交額681.64億元，周末前夕，交淡比較淡靜。
藍籌股個別發展，金融類股份普遍下跌，滙控(00005)據報將把全球高級營運團隊中的15%人手裁掉，涉逾200名資深經理，半日跌0.7%；友邦(01299)下滑0.6%；港交所(00388)跌1.9%；建行(00939)降1.3%；工行(01398)下滑1.5%；平保(02318)跌2%。不過科網股嘅美團(03690)跟阿里(09988)半日仍錄得升幅，騰訊(00700)跟京東(09618)則見回吐。
內房股已漸消化阿爺出招嘅消息，加上叫國有銀行揼水，都係治標唔治本，要扭轉弱勢，始終都係要樓市回暖，銷售轉活先有用。加上龍湖(00960)旗下一款債券「21龍湖04」大幅逾兩成，並觸發盤中臨時停牌，整個內房跟物管股板塊即時腳軟。龍湖半日跌6.5%；其他內房及物管股普遍跌逾半成，碧桂園(02007)跟碧服(06098)半日跌逾6%，成為表現最差兩隻藍籌股。
汽車股升完一日又回復弱勢，據《華爾街日報》報道，本田汽車暫停內地部分工廠生產，因受防疫措施影響，跟本田有合作嘅東風(00489)及廣汽(02238)，半日分別跌2.9%和2.3%；至於其他汽車股隨大市回吐，就連理想汽車(02015)11月份交付新車破咗紀錄，半日一樣倒跌0.5%，其他汽車股跌幅普遍超過1%。
港股急升後，需要時間整固，若然無乜特別利好消息，短線進一步回落至18400水平，下試100日線尋找支持，下破支持18000會係好友退守位置，至於好友最後防線，將會係17500-17600點，即係由14600延伸上嚟嘅上升軌底部，呢個位唔穿，後市仍可以一浪高於一浪形態繼續向上。
麥狄文
(徐狄怡‧證監會持牌人)
