美股隔晚感恩節假期休市，而外圍其他市場普遍做好，帶動今早期指高開，不過甫開波已直線回落，至現貨開市更一度倒跌逾200點，成交維持淡靜，除咗世盃效應，仲要周末前夕，再加埋期指轉倉，市場都採取觀望態度，半日成交不足500億元。
由於現貨開市，期指已由高位回落，恒指僅高開12點，跟住已掉頭向下，半日最多跌248點，見17415半日低位。其後跌幅收窄，於17500水平爭持。半日恒指報收17508，跌152點；國指半日跌55點，報收5936；恒科指半日跌73點，報收3509。
藍籌股普遍向下，近日成交縮水，港交所(00388)回軟亦正常，半日跌1.1%，不過股價仍企280元之上，未似要回補11月10日及11日所遺下嘅裂口。金融股仍然算硬淨，友邦(01299)半日升0.2%，大笨象(00005)無升跌，平保(02318)半日亦靠穩。至於科網股表現較疲弱，AMTJ全線向下，騰訊(00700)半日跌3.7%，大戶有心壓住指數，梗係要搵騰訊開刀。美團(03690)半日跌近3%，阿里(09988)半日跌2%，京東(09618)半日跌1%最硬淨。其他科網股普遍下跌，跌幅由2%至5%不等。資金開始炒股唔炒市，資金流入中小內銀股，國企中字股則翻炒。
值得留意係期指下周二結算前，係轉倉高峰期，反而指數壓返落嚟嘅話，下月轉好倉機會較大，加埋年結因素，阿Man仍然睇好下個月港股表現。條件係只要恒指仍守住17000水平，20日線(16922點)跟50日線(16992點)已滙聚，16900-17000仲守得住，由上月14600水平回升所引伸上嚟嘅上升軌底部唔穿，而20日線升穿50日線，大市即使再質落去17000邊企返上去，下月大市可重上18000挑戰100日線18528，甚至19000水平做年結，順手粉飾櫥窗。
好老實，噚日阿Man都話咗唔少缸邊友見市況淡靜，寧願賭波唔炒股，今日仲要星期五，加埋下周二結算，呢兩日係轉倉高峰期，今日不如提早收工，少做少錯，留返啲時間研究下呢幾日嘅世杯球賽事有乜嘢心水，買返幾場波，增添樂趣話唔定仲有收穫。
麥狄文
(徐狄怡‧證監會持牌人)
