隔晚美股早段升得好地地，但無啦啦波蘭境內中咗枝導彈，地緣政治局勢再趨緊張，不過美股收市仍能保持升勢；到亞洲時段，美股期貨曾跌逾百點，港股三日累升逾2000點後，今日借幾回吐。
恒指低開173點，開市無耐曾跌245點，見18097半日低位，但美國總統拜登稱波蘭事故導彈不太可能從俄羅斯發射，港股隨後止跌回升，恒指曾倒升70點，見18414半日高位。但嚟到呢啲位，買盤當然無咁積極，大市再度回落，又重返半日低位附近。恒指半日收報18133，跌209點；國指跌96點，報6172；恒科指跌近70點，收3744。半日成交額1004.92億元，雖然相對上日半場成交少咗8.4%，但仍錄得千億元成交都算係咁。
藍籌股普遍回軟，友邦(01299)半日跌0.1%，股價仍守75元水平之上，相對近日累計升幅，回吐壓力唔算大。大笨象(00005)半日跌1.2%，港交所(00388)跌2.7%。不過上周五阿Man喺另一專欄推介過嘅百威(01876)，隨住世界盃開鑼在即，半日逆市升3.6%，成為最大升幅藍籌股。其他藍籌股又唔算跌好多，係科網股回得多少少，其他藍籌股半日普遍跌幅都喺1%左右。
騰訊(00700)今日收市後公布季度業績，半日股價跌1.6%，ATMJ嚟講，今日都算硬淨，暫時守住280元短線支持；阿里(09988)半日同樣跌1.6%，明日公布業績，始終80至85阻力唔係話企就企。至於美團(03690)跟京東(09618)半日齊跌4%。每當地緣政治風險增加，資金變得審慎，一定先向科技股呢一類高啤打值嘅股份開刀。
10月70個大中城市新建商品住宅價格指數按年跌幅繼續擴至1.6%，幅度續創2015年8月以來最大，加上碧桂園(02007)配股後，又到雅居樂(03383)折讓18%配股，半日已失配股價，跌逾兩成，拖累本來守住配股價嘅碧桂園同樣失守配股價，半日跌17.5%，藍籌之中包尾。其他內房跟物管股跌逾一成比比皆是，事場擔心配股陸續有嚟，噚日以為碧桂園批完股唔死，原來又係假象。睇嚟要博呢個板塊，都係要揀返國企及央企背景嘅內房先夠穩陣。
麥狄文
(徐狄怡‧證監會持牌人)
