隔晚美股回吐，本來早段靠穩，其後亞馬遜宣布裁員，令大市氣氛轉差，尾市三大指數回落，不過中美元首會面後，達成六項共識，市場憧憬中美緊張關係降溫，今早港股早段倒跌後回升。
恒指高開46點，一度倒跌67點，見17552半日低位後，即使內地三頭馬車數據全線差過預期，大市在成交配合下節節上升，重上18000大關，最多升644點，見18264半日高位。中午恒指收報18257，半日升637點；國指升255點，報6234；恒科指收3796，急升6.8%。半日成交1097.26億元，雖然相對噚日半日成交少咗一成多啲，但維持半日有千億元成交額，總算配合升勢。
藍籌股普遍向好，不過以科網股表現最標青，喺業績公布前，騰訊(00700)半日升近一成；阿里(09988)明日公布業績，追落後升11%；京東(09618)升6.8%，算升得少；美團(03690)升7.8%，但170阻力無咁易突破。其他科網股升勢強勁，嗶哩嗶哩(09626)半日升近兩成，快手(01024)升12.7%，其他科網股半日閒閒地錄得半成以上升幅。科網股踏入業績期，但績前已炒高，小心業績稍為有差池，股價就回落，無貨嘅建議等待業績公布後再決定上唔上車。
有大行指阿爺出手救內房股，物管股可先走出陰霾，內房企業仲要睇吓啲債務問題搞唔搞得掂，同埋往後銷售成績如何，建議買返物管股先。碧桂園(02007)一直未有出現違約，不過最識把握機會好天斬定落雨柴，股價由低位彈逾200%，就趁機批股集資再籌38.7億元，不過股價半日跌8.3%，為表現最差藍籌股。
留意返今次碧桂園未有失守過配股價，若下半場股價能守住3元之上，咁強勁嘅走勢要值得尊重。今次亦證明咗，市場對整個內房板塊嘅悲觀情緒已完全扭轉，碧桂園一直係民企之中，財務狀況較理想嘅示範內房民企，不妨小注博佢守住配股價及企穩3元水平，從此否極泰來，股價上返4元亦合理。內地餐飲股係內地放寛防疫措施下造好，加上世界盃舉行在即，呢個板塊應該仲有得炒吓。
麥狄文
(徐狄怡‧證監會持牌人)
