隔晚美股表現反覆，英國首相卓慧思請辭，成為史上最短任期首相，一度令美股早段上升，但美國十年期債息升穿4.2厘，加上有聯儲局官員再放鷹，令美股調頭向下，三大指數倒跌散場。
至於港股兩日再跌逾600點，一度下試16000關後，今日好淡爭持，恒指半日波幅不足200點，但走勢仍偏軟。恒指高開50點，早段曾升78點，見16359半日高位，但周末前夕，買盤唔積極，好友又無乜力，雖然上證回升，但港股半日最多仍要跌103點，見16176半日低位。中午恒指報收16252，半日跌28點；國指升12點，報5524；恒科指半日跌升9點，報收3129。半日成交額只有500.03億元，噚日過千億成交可能今日不復見。
藍籌股個別發展，ATMJ半日反彈，不過力度有限，阿里(09988)70元呢個位危危乎，好淡爭持，至於美團(03690)跟京東(09618)都仲守住140元同160元，只係擔心久守必失。港交所(00388)半日跌1.3%，其實以其預測市盈率成30倍計，港交所真係唔值呢啲價，阿Man就睇死佢遲早跌穿250下試230元，只要唔升穿262元，都可以做淡港交所。
其他藍籌乏善可陳，升又升唔起，但都去到蔗渣價，落又唔會落得多。
電力股今日表現出色，內地動力煤價跌逾3%，電力股炒高，奇怪係動力煤價跌，連綠能股都炒埋一份，整個板塊今日向好，升幅由超過2%至7%不等。
另一個今日表現較佳嘅板塊係內房物管股，碧桂園(02007)半日升6.7%，成為最大升幅藍籌股，碧服(06098)半日升4.3%。其他內房物管股，半日至少都升返2%或以上，不過內房同物管股早已內傷，現價計就算彈返一兩成，大部份持貨嘅股東都係要重傷。
美國10年債息升到4厘以上，美債被視為無風險資產，咁啲一年派幾厘息嘅公用股，相對吸引力大減，尤其係啲一向唔會有乜嘢高增長嘅公用股，除咗收息都無乜其他吸引力，家陣買美國10年債都有4厘以上，公用股顯得更加廢。
港股都係一浪低於一浪，嚟到萬六邊都係無新資金肯入場，可見港股早已被投資者所拋棄，暫時仲係死到直一直。就連收息股都無運行，其他依靠增長嘅股份，就算唔再殺估值，短期內都難有作為，加上周末前夕，都係唔好手多多。
麥狄文
(徐狄怡‧證監會持牌人)
