熱門:

2022年10月11日 港股直擊 即巿股評

【盤房來料】熊市中安然過渡靠忍耐和等待

美股隔晚高開低走,尾市跌幅收窄。道指跟標指分別跌93點及27點;納指跌110點,盤中曾跌穿上周低位。嚟緊周三及周五美國將公布通脹數據,美股是福是禍,要睇通脹數據如何。嚟緊有銀行股為第三季業績期揭開序幕,唔少大行已表示喺庫存上升及勞工成本高企下,企業盈利難免被蠶食,一旦收入下跌,盈利亦難保。與此同時,標指淡倉正持續增加,當淡倉側埋一邊,唔排除美股反彈挾淡友。

美股隔晚走弱,加上今早美國10年期債息喺亞洲時段回升至逼近4厘,港股噚日跌逾500點後,今早跌勢持續,盤中曾跌逾300點,失守萬七大關,恒科指再創成立後新低。恒指低開21點,跟住見過17206半日高位後每況愈下,未幾已跌穿萬七大關,最多跌347點,見16869半日低位。不過A股又頂到幾吓頭鎚,恒指跌幅亦收窄,但中午收市仍要跌268點,報16948;國指跌109點,報5770;恒科指跌100點,報3298,半日跌3%。半日成交額502.76億元,都係咁上下。

藍籌股瓜多過菜,只有吉利(00175)公布9月總銷量增長26%,帶動汽車股回升,吉利半日亦升2%,比亞迪(01211)亦近2%。不過其他重磅藍籌股偏弱,雖然藥明生物(02269)旗下子公司已從美國黑名單中剔除,但噚日開市彈咗一彈又無影,最終倒跌收市,今日跌勢持續,半日再跌2%。大笨象(00005)跟友邦(01299)分別跌0.4%及1.3%,港交所(00388)半日再跌逾1%。

隔晚中概股喺美股插水,今日科網股喺港股呢邊亦要捱沽,新東方(09901)工作底稿,無法由美國公眾公司會計監督委員會(PCAOB)全面檢查或調查,半日插7.1%,其他科網股陪跌。美團(03690)盤中曾跌9.1%,半日跌幅略為收窄,都要跌6.5%,藍籌中表現最差。騰訊(00700)跟阿里(09988)半日分別跌3%及2.7%,京東(09618)則跌半成。其他科網股閒閒地跌3%或以上,拖累恒科指再創上市後新低。

個別私人內房債價急挫,內房股沽壓未除,今日整個板塊普遍插水,唯獨旭輝(00884)半日先跌近半成後反彈,中午倒升1.6%,其他內房股跌幅由1%至6%不等。電力股逆市造好,市場憧憬二十大再有利好政策扶持電力股,不過都係嗰句,家陣要喺港股贏錢難過登天,見升追入都係無乜好下場,暫時港股都係眼看手勿動,動親荷包痛,唯有忍耐同等待,先可以喺熊市中安然過渡。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads