熱門:

2022年9月20日 港股直擊 即巿股評

【盤房來料】港股反彈 欠見底訊號寧觀望

隔晚美股低開高走,議息前市場普遍預期今次議息會加0.75%,主要係等緊會後聲明,鮑爺放鴿定放鷹。不過10年期債息高見3.5%,睇嚟放鴿機會唔大,只係睇下有冇11月加息提示,究竟再加幾多。雖然人仔已見七算,不過阿爺話要力保上證3100不破,A股反彈,港股兩日再跌364點後喘定,半日反彈逾200點,但成交縮到400億都唔夠,沽壓有限,但亦無人願買貨。

恒指高開134點,升幅一度收窄至119點,見18685半日低位,就算無乜買盤積極買貨,但亦無沽盤再狠狠沽貨,大市升幅擴大至295點,見18685半日高位。中午恒指升246點,報18812;國指升86點,報6424;恒科指升95點,收3874。

藍籌股普遍造好,大笨象(00005)跟友邦(01299)分別升0.7%及0.2%;ATMJ全線反彈,普遍回升2%以上,百度(09888)亦升2.8%。不過碧桂園(02007)被標普調低信貸評級,逆市跌2.6%。濠賭股表現突出,除咗續牌明朗化,開始進入直路等開標之外,澳門由9月21日凌晨零時起,調整前往廣東省以外地方人士核酸檢測陰性證明要求,濠賭股乘機落鑊。銀娛(00027)半日升3.9%已經係升得最少,其他濠賭股半日錄得超過4%至7%升幅。

小鵬(09868)城市NGP(量產城市場景高端級智能輔助駕駛),已開始喺廣州試點,半日反彈一成,並且帶動其他汽車股向上。比亞迪(01211)重返220水平之上,半日彈近4%,不過一日受股神減持陰霾影響,都唔好期望太高。理想(02015)跟蔚來(09866)齊齊升逾6%,其他汽車股則反彈1%以上,講真呢吓彈完可以維持到幾耐,阿Man唔敢高興得太早。

多個專家兼商家都建議盡早復常,行政長官李家超出席行政會議前表示,本港近期新冠疫情有回落跡象,各部門亦正積極研究抵港人士檢疫安排有冇調整空間,當局會盡快公布,復常概念股受帶動向上。國泰(00293)半日升1.6%,盤中一度逼近前高位,但都未能突破9元,可能相關利好因素已反映,都要等真正復常再睇航運力恢復得幾多,國泰先有機會再爆發新一輪升浪。零售股普遍向上,不過升幅又唔算特別凌厲,主要係無乜資金肯入場,升勢好難保持得耐。

港股暫時叫守咗18500水平,但萬九已失亦唔見有買盤趁低吸納,繼續陰乾,就算保住3月前底唔失,都唔會有乜嘢睇頭,呢啲情況真係連短炒都可以慳返,齋睇等運到,唔出返個真正見底訊號,港股都只會繼續發吽逗。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads